Vladimir Putin chuan hun rei tak a thawhpui tawh Sergei Shogu chu a defence minister atangin a ban. Kum 68-a upa Shoigu hian kum 2012 atang khan defence minster hna a chelh tawh a, tunah erawh Russia Security Council secretary nihna a chelh dawn thung.
Russian parliament upper chamber-in paper an tihchhuah chuan Shoigu chu Deputy Prime Minister Andrei Belousov an a thlak ang a ti a. Kremlin chuan defence ministry chuan ‘thil thar’ a mamawh tiin a sawi.
Russian government paper tihchhuah chuan Putin-an security council thiltithei tak secretary nihna chu Shoigu chuan Nikolau Patrushev thlakin chang se a duh tia tarlan a ni a, Patrushev post thar tur erawh sawilan a ni rih lo thung.
Shoigu hi President Putin nena inhnimhnai tak niin tum tam tak sangha mana kal dun thin an ni a.
Military background nei miah lovin defence portfolio pawh chantir niin a tirah phei chuan Russia military thuneitu sang te an lungawi chiah lo hle a ni.
Civil engineer niin Shoigu hi kum 1990 chho khan emergency and disaster relief head a nih atanga hming chher chho a ni.
Defence minister a nihnaah erawh kum hnih kaltaa Russia-in Ukraine a run hnuah chetlak ngaihna vak a hre lo tia sawisel a ni thung.
Kum 2023 khan Shoigu chu vantlang hriatah Wagner mercenary chief Yehgeny Prigozhin nen Russia in indona a kalpui dan chungchangah an inchhang buai hle a.
Prigozhin chuan Shoigu chu na takin a sawisel a, sawiselnate chu a viral nasa hle a ni. Mahse, prigozhin chu St Peterburg atanga Moscow pana August 2023 a a thlawh laiin a thlawhna chesualin a thi zui a, Kremlin chuan engmah inhnamhnawihna a nei lo an ti thung.
Defence minister atanga Shoigu laksawn chuan President Putin chuan Russian economy chu indona kaihhnawih lam hawi zawnga thlunzawm a tum niin ngaih a ni a.
Kremlin press spokesman Dmitry Peskov chuan defence minister atana civilian ruat a ni chuan ‘innovation’ lama hmalak tumna a pholang tiin a sawi.
Russia chu kum 1980 laihawl vela Soviet Union dinhmun angah let leh tawhin khang hun lai khan GDP tam ber te chu military atan dah a ni a ti bawk a.
Military expenditure te chu Russia economy pum nena insuihzawm tha zawka siam a ngai a ni, tiin a sawi bawk a.
“Innovation lama inhawng a piang chu indona tuala chak zawk zel an ni ang” tiin a sawi bawk.
Russian expert te chuan Shoigu laksawn a nihna chhan chu thil mak a ni lo an ti a, hun rei tak ata tawh amah thlak duhna sawi a awm tawh an ti bawk a. A bik takin Ukraine a Russia campaign chuan hnungtawlhna nasa tak a hmuh zel vang an ti bawk.
Defence minister atana economist dah chuan Kremlin ngaih pawimawh a thlak dawn tiin BBC Russia editor Steve Rosenberg chuan a sawi a. Russain economy chu war footing a kal mekin indona atana defence ministry chuan fund a neih a ngai a ni a ti bawk.
Independent Russian website The Bell chuan sorkar official thusawi sawichhawngin Belousov chu ‘Russian humhim duh hard-line defender, Russia chu hmelma ten an hual vel’ tih ngaihdan nei tu a ni a ti.
President Putin ang bawkin Russian Orthodox Church nena inhnimhnai tak a ni a. President Putin ang bawka martial arts tuipui a ni bawk a, a thatlaiin karate leh Russian combat sports sambo te khel thin a ni bawk.
Deputy prime minister a nih hma pawhin Putin thachhangdawltu nia kum tam thawk tawh a ni a, economic development minister pawh ni tawh a ni.
Kum 2014 a Crimea run a nih pawh khan president Putin economic entourage member Crimea run remti awmchhun tia sawi a ni bawk.
Kar kalta Thawhlehni khan Putin chu Russian president thlanna neiha vote 87% a hmuh hnuah a tum nga na atan president atan lakluh leh a ni a. May 2000 atang khan Russia a la kaihruai ta char char a ni.
President Vladimir Putin cabinet member veteran zinga a dinhmun ngai luah awmchhun chu Foreign Minister Sergei Lavrov chauh a ni ta bawk.
Putin-a’n a defence minister thlak
Get real time updates directly on you device, subscribe now.
Next Post