Putin-a’n Modi-a hnenah Trump-a nena an inbiakna hrilh

Putin-a’n Modi-a hnenah Trump-a nena an inbiakna hrilh
Prime Minister Narendra Modi-a chuan Thawhtanni khan Russian President Vladimir Putin-a’n phone-a a biak thu sawiin tun hnaia Alaska-a US President Donald Trump-a nena an inbiakna chungchangte a hrilh tih a sawi.
Putin-a’n Modi-a a biak hma ni lawkah hian Ukrainian President Volodymyr Zelenskyy-a pawhin Independence Day khan a be bawk.
Prime minister chuan, “Ka thian President Putin-a’n tun hnaia Alaska-a President Trump-a nena an inbiakna min hrilh avangin ka lawm a. India chuan Ukraine-a buaina awm mek hi muanna a awm theih a duh reng a, chumi atan chuan a thlawp tlat a. Ni dang zelah pawh kan la inbiak zel ka beisei,” tiin X-ah a tar lang.
Putin-a’n a biak hma lawk hian Modi-a leh Zelenskyy-a chu an lo inbe tawh bawk a, hetah hian ram pahnih inkar thil leh indona kal mek chungchangte an sawi dun.
Inrinnia an inbiaknaah hian Modi-a hian Ukrainian mipuite hnenah an thana muanna an neih zel a duhsak tih a hrilh a, Zelenskyy-a hnenah hian Independence Day chibai buk nana a biak avangin lawm thu a hrilh bawk.
“Min duhsaka chibai min buk avangin President Zelenskyy-a chungah ka lawm a. India leh Ukraine inkungkaih ngheh zelna tura thil kalpui zel kan duh a. Ukraine-a kan thianten hian nakin zelah pawh muanna, thanna leh hmasawnna an neih zel ka duhsak a ni,” tiin prime minister hian X-ah tho a tar lang a ni.