Putin Mongolia-ah
Russian President Vladimir Putin chuan nikuma International Criminal Court (ICC) member tena amah manna tur ‘warrant of arrest’ an tihchhuah hnua a tum khat nan ram pawnah zinin Mongolia a tlawh.
Putin hi Mongolia leader te chuan capital Ulaanbaatar ah ropui takin an lo hmuak a.
Russian leader hi Ukrainian naupangte dan kalha ram pawna a thawnchhuah avangin international court mi duh a ni mek a ni.
Kremlin thupuangtu chuan Mongolia a zin chhungin Putin chu manin a awm lovang tiin a sawi zui bawk a.
Ulaanbaatar khawpuia Genghis Khan Square-ah sipaite chuan sakawr chunga chuangin martial anthems te play in Russian leader chu an lo lawm a, Mongolian president Uknhaagiin Khurelsukh nen inhmuhna an nei zui bawk a.
Genghis Khan Square-ah hian mi tlemte te chuan lungawilohna lantirna neiin ‘Get War Criminal Putin out of here’ tih te chu placard an lo ken khum thung.
Mongolia a tlawh hma hian Ukraine chuan Putin chu man tura ngenna tichhuakin, “Mongolia thuneitute chu international arrest warrant zawma Putin chu the Hague a Internationacl Criminal Court hnena thawn turin kan ngen a ni” tiin Ukrainian Foreign Ministry thuchhuah chuan a tarlang.
ICC chuan nikum khan Russian president chu Ukraine naupang te dan kalha Russia rama tam tham tak a thawnluh avanga war crime tia puhin manna thupek a lo tichhuak tawh a. Putin mai ni lovin Russian commissioner for children’s rights, Maria Lvova-Belova pawh manna thupek a tichhuak bawk.
ICC member-te chu arrest warrant tihchhuah a nih chuan zawm tura ngaih an ni a, mahse enforcement mechanism erawh a awm chuang lo. The Hague chuan kar kalta khan member ram te chuan thupek chu an zawm tur a ni a ti a. Mongolia chuan Ukraine emaw ICC ngenna chu chhanletna emaw siam a nei lo bawk.
Mongolia hi Soviet satellite state hlui niin kum 1991 a Soviet Union kehchhiat hnuah pawh Russia nena inzamwna thatak la nei zui zel a ni bawk. United Nations ah pawh Russia in Ukraine a run chu demin mahse vote laknaah a tel duh lo thung.
Mongolia hi landlocked state niin China nen ramri a nei bawk a, Russia chu gas leh electricity-a a innghahna a ni bawk. Russia chuan Tamal region atanga Mongolia kaltlanga China a natural gas pek luh nan Power of Siberia 2 pipeline siam tumin hma a la bawk a. He pipeline hi Russia hrekna avanga Europe in gas an leisak duh lova hralhna zawnna a ni.