Bangladesh chungchangah India dinhmun khirhkhan

Sheikh Hasina-i’n hmanhmawh taka an ram a tlanchhiatsan atanga thlakhat dawn a ni tawh a, tun thlengin Delhi hnaia military base-ah a la awm mek a ni.
5 August khan Hasina chu zirlaite kaihhruaia Bangladeh ram pum huapa lungawilohna lantirna avangin an ram chhuahsan lo thei lova siam a ni a. Tum dan hmasaah chuan India chu chawlh zuai nan chauha hman tum niin UK, US emaw UAE ah emaw asylum dil tum a ni a, mahse, a beisei angin engmah a kal lo thung.
India rama a la awm mek reng chuan Delhi tan harsatna siamin Dhaka-a sorkar thar nena inkungkaihna tha siamna tur kawngah harsatna a siam tia sawi a ni.
India tan chuan Bangladesh chu thenawm ram a ni saltiah lo va, strategic partner niin India border security plan a pawimawhna thuk tak nei a bik takin north-eatern states kaihhnawihah a ni zual a ni.
Ram pahnih te hian ramri 4,096 km laia sei neiin heng ramri hnaihah hian India a north-eastern state a hel pawl tam tak te chuan bukhuar nan bera an hman a ni tlat a ni.
Hasina sorkar Awami League party tena kum 2009 a thuneihna an chan chiah khan ethnic militant group te lakah chetla zuiin hel pawl tam tak te chu che thei lovin an siam zui a, hei mai bakah hian Hasina chuan India nena ramri buai te a chingfel hman nual bawk a ni.
Ramri chungchang chu ram pahnih te inkar thila pawimawh ber a nih rualin financial kaihhnawih pawh a awm tho. Hasina-i’n kum 15 chhung rorelna a lekkawh laiin ram pahnih te inkarah sumdawnna leh connectivity-in hmasawnna nasa tak a hmu a. India chuan kawngpui, lui leh train hmanin Bangladesh atangin north-eastern state ah bungrua thahnem tak a chawlut thina ni.
Kum 2010 atang khan India chuan Bangladesh infrastructure leh development project kalpui nan $7 billion chuang a pe tawh bawk a.
Hasina-in thuneihna a chan tak lohah chuan Delhi chuan hloh a neih loh nan sorkar thar lakah hmalakna a neih ngei ngei a ngai dawn bawk a.
“|henawm ram buai chu thil duhawm lo leh thleng lo se i duh a ni reng ang” tiin Pinak Ranjan Chakravarty, Dhaka a awm thin Indian High Commissioner hlui chuan a sawi a. Mahse, Delhi chuan Dhaka a interim sorkar nena inbiakna neiin mahse an thutlukna tur hriat a ni lo va, duh dan dana nawr theih an ni hek lo a ti bawk.
India sorkar chuan hun khawhral miah lova chet la nghalin Prime Minister Narendra Modi chuan telephone hmangin Muhammad Yunis chu a be nghal tawh bawk a.
Chutih rual chuan Delhi-in Hasina leh Awami League party te tun hnai kum 15 chhung zet a thlawp burna avanga Bangladesh thinrimna chu chuti maia dai tura ngaih tur a ni lo thung.
Bangladeshi tam tak te chuan Hasina party tena inthlan tum thum ngawta chakna an chan theih phahnaah Delhi thlawpna chu an puh bawk a ni.
Hasina a tlu a, Delhi in ‘neighbourhood first’ policy Bangladesh mai bakah Maldives leh Nepal te nena a kalpuia heng rama India dominance dinchantir a tumna chu a nghinga ngaih a ni bawk.
Analysts te chuan Delhi chuan regional powerhouse a nihna chu China influence lian zelah hloh thei dinhmunah a ding lo va, derthawnga dah thei a ni lo an ti bawk.
Nikum June thla khan Maldives-ah pawh Mohamed Muizzu an president dinhmun a chelh hnuah langsar takin anti-India policy a lo puang zui tawh bawk a ni.
“Regional policy a kalpuiah India chuan inenlet a mamawh” tiin Debapriya Bhattacharya, senior economists, Centre for Policy Dialogue, Dhaka chuan a sawi.
Bhattacharya hi Bangladesh interim govrnment-in Bangladesh economy siamthat a nih theih nana white paper duang tura a tih zinga mi a ni a.
Delhi hian chiang tak maiin a regional partner te ngaih pawimawh leh duh te thutakah a laksak dawn em tih a tihchian a ngai tia sawiin, “Bangladesh chauh ka sawi lo, helai region a ram dangte pawh ka sawi tel a ni” tiin Bhattacharya chuan a sawi.
Entirnan, Bangladesh bikah chuan India sorkar tawh te chuan Bangladesh Nationalist Party (BNP) te an thawhpui hleithei lo vek tawh thin tia sawi a ni a. “India chuan Bangladesh ram chhungah Wami League leh a sorkar bak allies a nei tak tak lo, chu chu thil pawi tak a ni” tiin Abdul Moyeen Khan, BNP senior leader chuan a sawi.
Bangladesh-ah inthlanna felfai leh thianghlim huaihawt a nih chuan BNP leader te chuan sorkar an siam ngei turah an inngai bawk a. Chutak chu Delhi tan chuan thil duhawm a ni lo mai thei. Begum Khaleda Zia kaihhruai BNP leh India inkarah inrintawnlohna lian tak a awm sa tlat a ni.
Zia chu kum 2018 atanga lung in tantir reng niin prime minister tum hnih ni tawh a ni a, Hasina-in politics thila che thei lova siam a tum tia puhtu niin tunah chuan lung in atangin a chhuak tawh bawk.
Delhi leh BNP leader te chuan an inmillohna te an chinfel ngei a ngai dawn a. BNP kaihhruai sorkar kum 2001 atanga 2006 inkar chhung khan Delhi leh Dhaka inlaichinna a chhe hle a, Delhi chuan Dhaka chu north-east helpawl te a rama awm tira humah a puh a ni.
Zia rorel laiin Bangladesh a Hindu leader te chuan sawisak leh nghaisak an tawk nasa tia sawi bawkin an dem nasa hle tawh bawk a. BNP te chuan chung te chu hnawl thungin anti-India insurgent te huma puhna chu an hnawl hmak thung.
India laka thinrimna Bangladesh-in a nei fo, ram pahnihte hian lui tui 54 lai intawm an nei a, hei vang hian water resources pawh inbakkaihna tham a ni.
Tun hnai lawkah Indian state Tripura a ruahsur nasa avanga Gumti river lian chuan ram pahnihah harsatna nasa siamin Bangladesh ram chhungah hmun tam tak tui lianin a chim a. Mi maktaduai telin harsatna tawkin Bangladeshi te chuan India chu dam atanga tui chhuah vakah puhin an dem hle a ni.
Chung mai bakah chuan factor pawimawh tak China a la awm bawk a. Beijing chuan Bangladesh-ah luhthuk a duh hle a, India nena regional supremacy inchuha hmanhlel reng reng a ni bawk.
India thunun reng nia ngaih Maldives pawhin Delhi hnungchhawnin Beijing a awn tawh a, Maldives president Muizzu an China a tlawhah pawh red carpet lo phahsak a ni.
Maldives a thil thleng chu Bangladesh ah thleng ve lo se tih chu India duhthusam a ni dawn a, Bangladesh chu Indians goods leh trade innghat a nihna chu China-in a chhuhsak hlauhna a lian hle bawk.
Chuvang tak chuan India rama Shiekh Hasina awm mek chu India in a enkawl thiam a ngai dawn a, Bangladesh sorkar tharin an rama thawn haw tura a ngiat phei chuan India in ngun tak a ngaihtuah ngei a ngai dawn a ni.
India chuan Hasina chu an ram chhuahsan turin a ti dawn lo va, tun hma atanga India thian tha chu chuti maia a hnawl a rem lo.
“India-in eng ang pawhin enkawl se a pawimawh ber chu India awm chunga Bangladesh ram chhung inrelbawlna thila inhnamhnawihna a neih loh chu a pawimawh ber. Hasina hian tuna interim sokar dodalna lam a sawi hlek a nih chuan chu chu thil pawi tak tur a ni” tiin Bhattacharya chuan a sawi a.
Delhi diplomats te chuan India tur luihna ni hauh lovin Hasina chuan duhthlanna a siam chu an nghak a ni ber.