PWD-in an FIR thehluh an hnuh kir loh chuan MNF chet an tum

PWD-in an FIR thehluh an hnuh
kir loh chuan MNF chet an tum
Zuangtuia hot mix plant tih chhiat chungchangah PWD-in police-a FIR an thehluh chu an hnukkir lo a nih chuan Zuangtui PWD office-a thawktute pisa kai tur tiamchin awm loa dan an tum tih MNF party chuan an sawi.
MNF Aizawl East-I Block thuchhuak chuan tunhnaia Aizawl East-I huamchhunga awm Zuangtuia hot mix plant, khawtlang mipuiin an duh lohna an lan tir chungchangah Zuangtui khawtlang tawrhna an hrethiam a, an thiam ang tawka hma an laknaah tih sual palh an neih chuan, sawrkar pawhin hrethiama ngaidam turin an ngensak tih a sawi.
Dan dik loa hot mix plant hman avanga harsatna thlengah PWD-in FIR an thehluh chu 2025 May 15 ralhmaa an hnukkir lo a nih chuan, Zuangtuia PWD Quality Control, Research and Development office-a thawktute pisa kai tur tiamchin awm loa dan an tum tih a sawi bawk.
‘Dan tam tak bawhchhe chunga Zuangtui khawtlang laka FIR an la thehlut ngam hi mak kan ti a. Home minister pawhin an FIR thehluh lo ziaklut tir lo tur leh PCB dan an bawhchhiat chungchangah dan anga thubuai siamsak zawk turin kan ngen a ni,’ thuchhuah chuan a ti.
Zuangtuia Local Council chairman pawh party khat ni lo mah se, Zuangtui khawtlang mipui a tawp thlenga an thlawp tur thu leh a tul a nih phawt chuan an tan ai pawh tan an huam thu MNF Aizawl East-I Block hian a sawi a ni.
MNF Aizawl East-I sawi thenkhat:
# Hot mix plant hi Mizoram Pollution Control Board-in a awmna hmun a dik loh dan, khawpui huamchhung atanga km.1 aia hnai lo leh sakhaw biakna hmun atanga km.0.5 aia hnai loah ti mah se, khawpui chhungah leh biak in kawt deuh chiahah a awm.
# He khawlin pollution chhia a tih chhuah tam lohnana diesel hman tura tih a nih laiin, diesel aia chhe zawk, la refined loh – crude oil an hmang hi a dik loa, chumi piahlamah a khu leh a rim a chhuah tam lohnan a hnuaia tui awm reng tur chu tui dah a ni ngai lo. Zuangtui khawtlangin pipe lei ula, luikawr tui kan laksak ang che u, ti thin mah se, an ngaihsak lo
# Lirthei neitu mipui lakah sawrkar hi pollution certificate-ah an khauh em em laiin, sawrkar zawkin dan hre reng chunga a bawhchhe reng mai hi mipui tham lohna a ni a, MPCB-in sum tam tak chawi tir ngei rawh se.
# Dan dik takin he khawl hi hman nise Zuangtui khawtlang hian an veng atanga sawn chhuah em em pawh an tum a ni ber lo. Mahse, tu mitmei mah veng loa dan an bawhchhiat luih tlat avanga he boruak hi thleng a ni tih hi mipuiin hriatsak ila.