PWD minister-in chhim lam hmun hrang hrang tlawhkual
PWD minister-in chhim lam
hmun hrang hrang tlawhkual
PWD minister Vanlalhlana chuan Mizoram chhim lama kawng dinhmun enin a tlawh kual mek a. Hnahthial leh Sangau tlawhin Siaha-a a riah hnu ah Thawhlehni khan Lawngtlai district-a Kaladan Multi-Modal Transit Transport Project (KMMTTP) leh PMGSY III Road, Diltlang ‘S’ – Chawngte ‘P’ kawngpui sial mek a hmunah a enfiah.
KMMTTP chu kawngpui pawimawh tak a nih avangin uluk leh duat taka enkawl a tul tih minister hian a sawi a. KMMTTP chhaklama NHIDCL-in NH-54 kawngpui an laihah leivung an paih fimkhur tawk loh avanga harsatna awm thin chu veiawm a tih thu a sawi. Hmun thenkhata kawng tlabal leh chhe zual lai chu chak taka siamthat mek a ni chu lawmawm a tih thu sawi a. Sawrkarin kawng tha a ngaipawimawh tih sawiin, kawngpui siamthat hna thawktu ABCI pawh tha leh rintlak taka hna thawk turin a chah.
PWD minister hian PMGSY III Road a endiknaah amah lo hmuaktu Diltlang ‘S’ khawtlang hnenah, sawrkarin kawngpui tha neih a duh avanga a hmuna kal a ni tih sawiin, contractor chu an hna uluk a, tha leh rintlak taka thawk turin a chah a ni.
PWD minister Vanlalhlana hi Thawhtanni zan khan Siaha-ah a riak a, bawrhsap VL Hruaizela Khiangte hoin district official thenkhatin lo hmuakin an inkawm. Siaha district-a kawng sial hna thawh mek leh kawngpui dinhmun ena zin a ni tih sawiin, district chhunga kawng dinhmun fiahfai zawka en tura zin leh ngei a tum tih a sawi.
PWD chu department pawimawh tak, kawng siam bakah building sak, lei dawh leh project lian tak tak thawk thin an nih avangin fimkhur tak leh ram hmangaihna tak tak nen thawh a pawimawh tih a sawi a. Kawngpui siam ringawt a tawk loa, intlawhpawhna tha a awm theihnan tha taka enkawl zui a tul tih a sawi bawk.
Siaha-ah hian bialtu MLA Dr K Beichhua hoin MADC CEM M Laikaw leh a thawhpuiten an lo dawngsawng a. KMMTTP a tlawhnaah hian Lawngtlai West bialtu MLA C Ngunlianchunga’n a lo dawngsawng.
Minister hi deputy speaker Lalfamkima, Lunglei West bialtu MLA T Lalhlimpuia, PWD engineer in chief H Zoramliana bakah PWD hotu dangten an tawiawm a ni.