By Rinfela Zadeng
Khawvel finna lo sang zelah hian Pathian thu (theology) leh Science hian nasa takin hma a sawn a. A tira kan thil zir leh hriatte chu kan thawm tha a, hma a sawn belh nasa em em a. Thil nihna bul hi hriat tumin nasa takin kan zawng a, Philosophy leh Science hmangin kan zawng a. Bible atangin Kristiante chuan kan zawng bawk a, chu chu khawvel awm chhunga mihringte buaipui ber tur a ni ang.
-- Advertisement --
Eng nge Quantum Physics?
‘Engkim hi thil te tak te te atanga lo insiam an ni’ tih hi Quantum Physics innghahna laimu a ni a. Latin tawng ‘Quanta’ tih atanga lo kal niin ‘engzat nge?’ (an amount/how much) tihna a ni a. Science thiamna hmanga khawvela thil siamtu ‘atom’ te lo awm dan zawng zawng chhuina hi a ni kan ti thei awm e. Mita kan hmuh theih atanga mit lawng leh enlenna (microscope) hmanga kan hmuh theih loh thlenga thil te ber nih phung leh awm dan, a lo insiam tan dan zirna zawng zawng hi ‘Quantam Mechanics/Quantam Physics’ chuan a huam vek a ni tiin kan sawi awlsam thei mai ang.
Atom, nucleus, electron, proton, neutron leh quarks
Physics khawvelah chuan Isaak Newton leh Albert Einstein te hming hi kan lam hmaih a thiang lo. Anni hian bul tanin khawvel leh van thengreng (universe) nih phung chu Science – Physics hmangin min hrilhfiah a. Chuta tang chuan Physics chuan hmasawn zelin tuna kan sawi mek Quantum Physics zirna chung chang hi Niels Bohr leh Max Planck te chuan lo tichhuakin an pahnih hian Nobel Prize (Physics) pawh an dawng hial reng a nih kha.
Atom aia te zawk thil (particles) chu an zir bing a, eng hian nge mita kan hmuh theih loh atanga kan awmna khawvel leh van thengreng (universe) te hi lo siam tih kha an zir ta tluk tluk mai a. Atom chu an phel darh a, nuclues, electron, proton leh neutron-ah te phel darhin a te thei ang berin an phel sin leh a, ‘sub -atomic’ tiin an sawi thin a. Chungte chu Quarks tiin an la sawi leh bawk. Chung thil (particles) te chu an inhip bet tawn a, an mahni khawvel chhungah chuan an vir kual mup mup niin an sawi bawk.
Chutianga an inhiptawnna chu ‘elecromagnetic force’ an ti a, ‘electromagnetic force’ ang tak taka zirchian theih a nih loh avangin ‘quantum’ tiin an sawi lar ta zawk a. Chu chuan a nihna pawh a phawk chhuak zawk deuh a ni. Hetah hian mihringin kan hmuh leh kan hriat tawh atanga tehna kan siam (natural law) te hian awmzia an nei tawh lo a, hun (time) kan tih te pawh a mumal tawh lo hle a ni. Engmah loah an chang zo ta vek mai han ti ila kan sawi uar lutuk lo ang.
Higgs Bonson/God’s Particle
God’s particle (Higgs boson tia hriat bawk) hi a chunga kan sawi te nihphung (subatomic particle) a ni a, kum 1960 chhoa physicist Peter Higgs-a’n Standard Model of particle physics-ah a telh hmasa ber a ni. Kum 1964 khan Peter Higgs chuan Science zirna chanchinbuah (scientific journal) thuziak a thehlut a, chu chuan hmunawl (space) zawng zawng hi field pakhatin a khat a, chu chu Higgs field tia koh a ni ta a, chu chuan thilte (particles/atom) hnenah nihphung (mass) a pe a ni.
He a thuziah (theory) hi July 2012 khan Switzerland-a Large Hadron Collider (LHC) hmangin an finfiah a, khawvela particle accelerator (universe-a matter zawng zawng siamtu particle-te ti chak a, an inzawm khawm emaw, target-ah emaw an inhnawh khawmtu hmanrua) lian ber leh chak ber a ni. Higgs boson finfiahna hi science lama hmasawnna lian tak anga ngaih a ni a, kan universe siamtu bulpui ber berte hriatthiamna tha zawk a pe a ni. Hei vang hian kum 2013 khan Peter Higgs hian Nobel Prize (physics) a dawn phah a nih kha.
|ingtang hrui parukte hi field hrang hrang paruk a ni angin han ngaihtuah ila. |ingtang chu kan perh loh chuan field te chu an chawl a, a hrui parukah chuan engmah a thleng lo. Hrui pakhat kan perh chuan a nghawr (vibrate) tan a, chu a nghawr chu a field-a particle ang mai a ni. Particle chu a particle field-a vibration anga ngaih theih a ni. Chuvangin quark te kha, quark field chhunga vibration an ni. Hei hi elementary particle (thil awmna bul siamtu) zawng zawngah a hman theih.
Tui hnuaiah a chak thei ang bera tlan emaw kal turin emaw han mitthla ta ila. Kan chhehvela tui chu Higgs field ang a ni a, keini chu thil nihna bul (elementary particle) ang kan ni ang. Tui chu a khauhin a chhah a, khawmuala kan kal angin tui chhungah chuan kan kal pangngai thei lo. Chutiang chu Higgs field hian particle te hnena mass a pek dan chi khat chu a ni. Tui chu boruak aiin a chhahin a muk zawk a, chak taka kal tur chuan thahrui tam zawk kan mamawh a ni. Higgs field hi tui ang a ni a, a chhunga kal tur chuan particle hian nasa takin hna a thawh a ngai a ni. Quarks te hian an mass hi Higgs field chhunga an kal dan atang hian an hmu thin.
Chuvangin thil te ber atanga vawiina kan nihna tur kan nih theihna chhan chu Higgs Boson-ah hian an hmuhchhuah avangin ‘Pathianin a lo dah a ni e’ tiin Leon M. Lederman, American Physicist khan a lo sawi a, a lar zui ta hle a ni. Engkim, Big Bang kan tih te pawh a lo awm tan theihna bul, mass an neih theihna bul chu ‘Higss Bonson Field’ kan tihah khian a innghat a. Chutianga lo awmtirtu chu tu nge tih kan hre lo a. Keini Kristiante chuan Pathian a ni tiin kan pawm mai a ni.
Science thiamna hian Pathian hi a um char char a, Pathian ropuizia hi Science hian a hmuchhuak nasa tawlh tawlh a ni. Heng thil te ber leh engmah lo atanga vawiin leh nakin thlenga thil ropui tak tak lo awm theihna chhan hi – tu emawin thiam tak leh a dik tak chiah chiaha a siam (design) a ni tih hi chu Pathian awm ring lo Scientist te pawh hian an ring ve tho a ni.
Science hian chik tak leh a bul thum tawpkhawk hi zawn chhuah tumin hma a la a, a zir thuk tulh tulh a, Pathian a mamawhna a tlem tial tialin a hria a. Mahse vawiin thleng hian a tawpa a hmuh chhuah chu – a tawpah hian a nih dan tura engkim lo duanga lo rem fel sa thlaptu, Science thiamna hmanga engtia lo awm nge tih finfiah theih loh thil bawk hian a lo hmuak leh ngei ngei zel a nih hi.