Tun kum liamta hnuhnung kum li chhunga Tum thum ngawt French Open women’s single title latu Iga Swiatek chuan Roland Garros-a khelh mek kumin clay-court grand slam-ah pawh rinkai ber ni leh mekin, a title kawl lai humhim tura a chetchhuah vawikhatnaah samkhai taka qualifier Leolia Jeanjean hnehin second round a lut a, kum 2007 daih tawha record siamtu Justine Henin hnu lama hmeichhe zinga French Open title vawithum la zawn leh thei hmasaber nih a tum mek laiin mite fakna ‘Queen of Clay’ tih chu a la intipawm duh chiah lo a, a la hma deuh a ti!
World number one Swiatek hian minute 61 lek chhungin Jeanjean lakah 6-1 6-2 hnehna awlsam a chang a, Tum li lai major champion ni ve tawh Naomi Osaka a hmachhawn leh ang.
Mipa lama French Open title 14 la tling thei awmchhun Rafael Nadal kha ‘King of Clay’ tih a ni chungin ani kha pa uangthuang lo leh chapo lo zet niin, hlawhtlinnain a tihdanglam theih loh mihring tiin an sawi Thin.
Paris khaw tournament lianah khati tak khan hlawhtling mah se a nungchang leh chetziaah mit han tikhamn leh danglamna engmah hmuh tur a awm ngai lo a, tunTum first round match-a Germany star Alexander Zverev a ngam loh Tum pawhin racket han vawchhe zawng emawin a khawsa lo a, hmuh nuam takin khelmual a chhuahsan a, Wimbledon lam thlir loin Olympic-a inlan a tum thu leh a tlawmna muala ram tana Olympic match khelh leh a tum thu Tha takin a sawi mai a; Swiatek pawh hian Spaniard nungchang entawnin mite fakna a la hnawl ve rih!
French Open title hnuhnung pahnih latu a nihna piahlamah he clay-court grand slam inbuatsaihna tournament lian indawt pahnih Madrid leh Rome khaw clay-court title la zo hlimhlawt ni chunga Paris thleng a nih tlat avangin kumin pawh hian Paris title hawn leh tura ngaih ngheh bur a ni.
ThawhTannia hnehna nuamsa a chan zawhah chanchinbumite’n 14-time French Open men’s champion Rafael Nadal ang deuhin ‘Queen of Clay’ ni ve thei mai tawhah a inngai em tih an zawt a, Swiatek chuan, “A la hma lutuk mah mah deuhin ka hria,” a ti.
Sawizawmin, “Ka hlawhtlin ve tawhnate hi ka chhuang takzet a, he’ngte avang hian he khelmual hi ka khelmual ngainat a ni chho mek a, mahse, bul ka la Tan chauh a, Nadal lak aTang hian zirlai tam tak zir tur ka la nei a, pa Tha a nihna leh player Tha a nihna zawnah hian entawn tur tamtak ka la nei,” tiin he khelmuala hlawhtling chungchuang Spaniard Nadal laka zir tur tamtak a la neih thu a sawi.
Kum 22 mi Swiatek hian hnehna a chan hnuah Nadal leh Alexander Zverev inkhel en turin Court Philippe Chatrier a pan leh ngat a, tah chuan reporter-te’n lo kawmin, khelmual chhung leh pawn lam thlenga Spanish great khawsak dan chu entawntlak a tih thu hahipin a sawi a, Nadal-a inngaihtlawm rengna leh hlawhtlinnain a nun a tidanglam lua lo chuan a hneh hle tih a tarlang tel bawk.
ThawhTanni vek khan player langsar dang Ons Jabeur, Coco Gauff leh Marketa Vondrousova-te paw’n hnehna changin second round an lut ve bawk.
Greek sixth seed Maria Sakkari erawh 3-6 6-4 6-3-in tualchhung nula kum 23 mi Varvara Gracheva chuan a hnawtchhuak thung.
2021 French Open semi-finalist Sakkari hi Grand Slam-a a inlan hnuhnung vawingaah Tum li ngawt first round paltlang zo lo zawngin a khawsa tling ta a ni!
Britain player Harriet Dart pawh 7-6 (7-3) 6-4-in Czech 27th seed Linda Noskova laka a tlawm a; nizana British number one Katie Boulter leh world number two lo ni tawh Paula Badosa of Spain inkhel result erawh tarlan hman a ni lo.
French Open quarter-final la pel ngai reng reng lo Tunisian Jabeur chuan a grand slam title hmasaber tur a beisei leh mekna kawngah bul a Tan fuh leh phawt a, American wildcard Sachia Vickery laka 6-3 6-2 hnehna lawm chungin second round a lut.
Grand Slam tournament-a Tum thum ngawt runner-up ni tawh kum 29 mi Ons Jabeur hian nikum khan Roland Garros-ah hian quarter-final lutin, thla khat liam hnuah Wimbledon final khel zui lehin Vondrousova a hneh lo a; kum 2022 khan Wimbledon leh US Open final-ah a chak lo ve ve bawk.
Hmeichhe singles first round inkhel dangah Vondrousova pawhin ruah rawn thlen hma chiahin Spain player Rebeka Masarova lakah 6-1 6-3 hnehna nuamsa a chang.
US Open champion Gauff pawhin 6-1 6-1-a Russian qualifier leh world number 208 ni bawk Julia Avdeeva vawtla turin minute 52 bak hun a mamawh lo.
American 11th seed Danielle Collins chuan a chipui Caroline Dolehide lakah 6-3 6-4 hnehna lawmin, Italian 12th seed Jasmine Paolini pawhin Australian Daria Saville lakah 6-3 6-4 hnehna a chang ve bawk.
Ukrainian 15th seed Elina Svitolina chuan set khatna hloh zet chungin Czech Karolina Pliskova lakah 3-6 6-4 6-2 hnehna a changkir a; Russian 17th seed Liudmila Samsonova chuan 6-1 6-1-in Poland nula Magda Linette a sawp thung.
‘Queen of Clay’ tih la duh lo Swiatek
Get real time updates directly on you device, subscribe now.
Prev Post
Next Post