Quiz-ah St Joseph HSS thiam ber

Quiz-ah St Joseph HSS thiam ber
Mizo Zirlai Pawl buatsaih Inter-High School Quiz 2024 intihsiakah St. Joseph Higher Secondary School chu pakhat a ni.
MZP Inter-High School Quiz hi October 21- 25 chhunga neih a ni a, a tawp kharna hmanpuitu Home minister K Sapdanga chuan MZP buatsaih Inter High School Quiz chu inelna a ni satliah mai loa, kan ramin mithiam tak tak a mamawh a, chumi tura inchherna tha tak leh pawimawh tak a ni tih a sawi. Mizoramin a mamawh chu mi taima, thawkrim leh mi rinawm an ni, tiin, thawkrim taka an zirlai zir tur leh rinawm zel turin zirlaite a chah a ni.
MZP president H Lalthianghlima chuan zirna kawng kan zawh mekah kan tum san a ngai hle tih a sawi a. Mizoram Civil Service-a lungawi mai loa, IAS, IPS nih chhoh tum ngei turin zirlaite a fuih.
Ram changkang zawkah chhiah tam tak an pe a, tun sawrkarin oil kaltlanga chhiah pek tur a siam chungchangah MZP chuan, a hman chhuah lehna tur chu midang tan nilo, kan ram tan, keimahni tana hman tho tur a nih avangin, sawrkarin chhiah a lak chu tha a ti a, chutih rualin a hmang dik em, tih erawh MZP chuan a enzui zel dawn tih a sawi a ni.
Quiz inelna tumsaktu Mizoram Building & Others Construction Workers Welfare Board aiawhin secretary Angela Zothanpuii leh Aizawl Smart City Ltd. aiawhin public relations officer Lalhmangaihsangi ten thu an sawi bawk.
MZP Inter High School Quiz 2024-ah hian school 22 an tel a, pakhatna St Joseph HSS niin, sumfai Rs. 30000 an dawng a; pahnihna CLS Academy niin Rs. 20000, pathumna Solomon’s High School-in Rs. 10000 an dawng a. Trophy leh certificate an dawng theuh bawk. Best Quizzer lawmman chu C Lalramtiama, St Joseph HSS chuan a dawng a ni.