R-Day khual lian tur Indonesian president-in Delhi thleng

Indonesian President Prabowo Subianto chuan India a tlawh hmasak ber turin Ningani zan khan ram khawpui ber a lo thleng a, Republic Day-ah khual lian a ni ang.
Minister of State for External Affairs Pabitra Margherita-i’n New Delhi-a tumhmunah a lo dawngsawng.
President Subianto hi Pathianni thleng a châm dawn a, Republic Day vawi 76-na lawmnaah khual lian a ni ang.
Ministry of External Affairs chuan India a lo zin hian India-Indonesia Comprehensive Strategic Partnership awm lai chu a tinghet lehzual dawn tih a puang.
President Subianto-a pawh hian an ram a chhuahsan hmain India a tlawh tur chuan venhimna, tuipui leh digital technology-a ram pahnih thawhhona a tihngheh tur thu X-ah a tar lang ve bawk.
A cham chhung hian president hian Prime Minister Narendra Modi, External Affairs Minister S Jaishankar, President Droupadi Murmu leh Vice President Jagdeep Dhankar te a kawm dawn.
Zirtawpni tlai khan External Affairs Minister S Jaishankar nen inkawmin Taj Mahal Hotel-ah zanriah an kil dun.
Inrinniah hian chawhmaah Rashtrapati Bhavan-ah amah lo lawmna hun buatsaih a ni ang a, Rajghat-ah pangpar a dah zui ang.
Prime Minister Narendra Modi nen Hyderabad House-ah an inkawm ang a, memorandum of understanding (MoU) thahnem tak ziakin thuchhuah intawm an siam bawk ang.
Tlaiah Vice President Dhankhar nen Taj Mahal Hotel-ah inkawmin zanah President Murmu nen Rashtrapati Bhavan-ah an inkawm bawk ang.
Pathianni hian President Subianto hi Republic Day Parade-ah telin khual lian a ni ang a, chawhnuah President Murmu-i’n Rashtrapati Bhavan-a ‘at home’ a huaihawtah a tel zui ang a, tlaiah a haw ang.
Rebublic Day lawmnaah hian President Subianto bakah hian an ram atangin parade-ah mi 352 an inlan tel ve dawn a. India ni bika Indonesia aiawh an tel hmasak ber a ni ang.
President Subianto-a hi Indonesian president zinga India Republic Day lawmnaa tel palina a ni.
Prime Minister Modi-a chuan kum 2018 khan Indonesia tlawhin India-Indonesia inkungkaihna eng emaw zat siam a ni a. Comprehensive Strategic Partnership leh India-Indonesia Maritime Cooperation in the Indo-Pacific pawh hemi tum hian an duang.
Nikum November thla pawh khan Modi-a hian President Subianto-a hi Rio de Janeiro, Brazil-a G20 Summit-ah khan a lo kawm tawh bawk a. Tun hi India-a an inkawmna hmasa ber tur a ni.