Ragasa vangin Taiwan-ah mi pahnih thi, China leh Hong Kong nuai bawk
Ragasa vangin Taiwan-ah mi pahnih thi, China leh Hong Kong nuai bawk
Super typhoon thawk avanga dil insahin tui nasa taka a tihlen avangin Taiwan khawchhak lamah mi pahnih an thi a, mi dang eng emaw zat tang leh chin hriat loh an la awm bawk tih fire thuneituten an sawi.
A hma lama lei minin tui a khuap, dil lian tak insiam ta hi Thawhlehni chawhnu khan chimin a bul hnaia Hualien county-a Guangfu khuaah buaina a thlen.
Taiwan hmun hrang hrang atangin chhanchhuah hna thawktuten an pan mek zel a. Super Typhoon Ragasa hi kumina thawkah chuan a la na ber niin China chhimthlang tuipui kam hnaiah a la awm mek.
Guangdong province-ah Nilaini khan khawmual a kai leh a, mi 370,000 vel hmun himah suan lawk niin sikul leh sumdawnna hmun khar a ni a. Hong Kong-ah pawh typhoon warning pariat tihchhiah niin hei hi a sang ber aia level hniha hniam a ni.
Category 5 hurricane nena intluk, Ragasa hian a chak lai ber, Thawhtanni khan darkar khata km 285-a chak thli a keng tel a. Tui lian, tui fawn sang tak leh lei min a thlen thei a, kalkawnga awmte an inring hle.
Taiwan hi Thawhtanni khan Ragasa siperin a nuai a. Thliarkar khawchhak lamah ruah cm 60 dawn a sur niin Reuters news agency chuan a tar lang.
Hualien county-ah hian dil insah hian lei a la a, thing kung tam tak tluin lirtheite pawh tuiin a chim nasa hle a. Video thehdarhah chuan tui chak takin a luang hum hum tih a lang.
“Hmun thenkhatah chuan tui hian in chhawng hnihna a chim thleng a, khaw lailiah pawh chhawng khatna thleng a chim pil a, tui hi a kam leh thuai thung,” tiin Hualien County Fire Department deputy chief Lee Lung-sheng chuan AFP news agency a hrilh.
“Mi 263 chuang tang awmin lui a len thut hnuah mi tam tak hmun sangah an insaseng a. An dinhmun a ngaihtuah awm lo va; mahse, tui chim chin sang zel avangin an chiai hle,” a ti.
Taiwan-ah hian Ragasa avanga chhiatna thlengah mi parukin hliam an tuar a, lawng service chawl vekin ram dang thlawhna lut leh chhuak tur 100 chuang thulhtir an ni.
Chinese thuneitute chuan tui fawn metre ngaa sang a tling thei tih an sawi a, Guangdong-a cheng mi 3,70,000 chu hmun himah saseng an ni bawk tih an sawi.
Hong Kong International Airport-ah chuan Thawhlehni zan dar 06:00 atang khan thlawhna che vel buai tanin Nilaini thleng khan an la che hleithei lo.
Cathay Pacific thlawhna 500 chuang tibuaiin Hong Kong Airlines pawhin khawpui atanga an thlawhna chhuah hun an sawn vek bawk.
Ragasa hi China-a khaw chin zirtute chuan ‘King of Storms’ an ti a, hmar lam hawiin Vietnam a pan zel dawn a, mi maktaduai tel a la tibuai dawn niin ans awi lawk.
Ragasa hian Thawhtanni khan Philippines hmar lama thliarkar kilkhawr tak a lo nuai tawh bawk a, mi pakhat thiin chhungkaw sang tel hmun hima saseng lawk an lo ni tawh bawk.
An khawpui, Manila tiamin an ram chhung hmun tam takah sikul leh sorkar pisa khar a ni.