Rahul-a’n Agniveer Scheme titawp ang ti

Haryana-a Lok Sabha election rally a neih hmasak berah Congress leader Rahul Gandhi chuan May 22 khan Prime Minister Modi chu nataka beiin ‘a hmingthatna a hloh tawh’ a ti a, chumai bakah mipui ten thuneihna chang tura an vote tlng anih chuan Agniveer Scheme nuaibo in loneitute leiba an ngaidam ang a ti bawk.
Agniveer Scheme chungchang sawiin Rahul Gandhi chuan Modi chuan India sipai te chu labourer ah chhuahin martar chi hnih – pakhat maratr status, pension leh facility tin nei leh a dang mirethei chhungkua chutiang nei ve miah lo tur a siam a ni a ti.
Agniveer chu Modi hovin Prime Minister’s Office in an duan a ni a, Army te duan a ni lo a ti bawk a. INDIA bloc sorkar chuan ‘bawlhhlawh bawmah kan paih ang’ tiin a sawi bawk.
Loneitute leiba ngaihdam leh an thlai te Minimum Support price pek tiam bawkin Gandhi chuan loneitu ten Modi chu ‘a billionaire thian tha 22 te a tihsak ang bawkin’ an leiba te ngaidam tura an ngenin ‘loneitute duatsualna’ tiin a tang tlat a ni. Mahse, keini chuan loneitute chu duatsualin thuneihna kan chang a nih phawt chuan an leiba te kan ngaidam ang, tiin Gandhi chuan a sawi bawk a.
“Loneitu ten leiba ngaihdam tur an neihin commission dinin panel ten zirchiangin min hrilh anga kan tih mai ang” tiin Gandhi chuan agrarian State a fankualnaah a sawi a ni.
Gandhi chuan ram pumin sorkar chu billionaire Gauam Adani an a enkawl mek a ni tih an hria a, Modi chuan airports leh railway station te chu Adani Group te hnenah hralh vek tawhin a hmingthatna a hloh tawh a ti a. “Balloon a puakkeh tawh” tiin Rahul chuan a sawi bawk.
Congress president hlui chuan a sorkar chuan economy siamthat leh nan leh hna tautet siam nan mirethei chhungkua te bank account ah thlatin Rs 8,500 a thunsak ziah dawn a ti bawk a. Chumai bakah MGNREGS wages chu Rs 400 a tihpun leh ASHAs leh Anganwadi worker te hlawh a leta tihpun tiam bawkin graduate tharte hnenah “Right for First Job” kan pe bawk ang a ti bawk.
Minute 30 chhung a thusawi tihtawp nan Gandhi chuan a ipte atangin Constitution of India pocket edition lachhuakin mipui te chu humhim tlat tura ngenin Bharatiya Janata Party te chuan ualau takin Constitution nuaibo leh reservation nuaibo an tum thu an sawi a ni a ti bawk. Haryana a Lok Sabha seat 10 te chu inthlan thawh rukna May 25 ah an inthlang dawn a ni.