Rahul-a’n PM Modi a ‘hlauthawng’ ti
Prime Minister Modi-an Congress te chu “Ambani leh Adani” te nena inzawmna nei tia a puh hnuah Congress leader Rahul Gandhi chuan PM Modi chu Central Bureau of Investigation (CBI) leh Enforcement Directorate (ED) te chhuichiantir turin a cho.
Telangana-a rally a neihah Narendra Modi chuan Congress te chuan Rahul Gandhi an a sawisel ngai tawh loh hnuah sumdawng lian pahnih atangin ‘black money tam tham tak an dawng’ tiin a sawi a ni.
Hei hi chhang letin Rahul Gandhi chuan video tichhuakin Modi chu sum tam tham tak dawn chu ‘i mimal thil tanw thin’ a ni zawk lo maw tia sawiin Prime Minister chu ‘a hlauthawng tawh’ a ti bawk.
Telangana-a temple lar tak Vemulawada a election meeting a neihnaah Prime Minister chuan Congress te chuan ram mipuite hnenah eng vanga Ambani leh Adani issue chu sawi tawh ngai lo nge an nih an sawifiah a ngai tiin a sawi a.
Rahul Gandhi hming sawi lang chuang si lovin Congress Shezada (prince) hian tun hnai kum nga chhunga BJP te beih nan ‘industrialists panga’ tih tawngkam hmangin a au reng a, tun hnaiah erawh inthlan tur puan a nih hnuah a ngawi ta daih tiin a sawi a.
“Telangana leilung atang ngei hian ka zawh duh chu Shehzada hian Ambani-Adani atangin engzah nge a dawn sawi rawh se. Sum tam tham takin Congress a thleng em ni? Eng nge inremna an neih le, zan khat thil thuah Ambani-Adani sawiselna a tawp tak daih?” tiin Modi chuan a sawi.
“Thil fel lo leh dik lo chu a awm a ni. Kum nga chhung tehmeuh chu Adani-Ambani an sawisela zan khat thil thuah an titawp thut a. Chumi awmzia chu sum tam tham tak i dawng tihna a ni mai. Black money ip engzah nge i dawn, ram mipuite zawhna i chhan a ngai” tiin prime minister chuan a sawi bawk.
Hei hi chhang letin Rahul Gandhi chuan X hmanga 46-second video tichhuakin Modi chuan sumdawng tena sum an pek thin chu ‘i mimal tawnhriat’ thin a ni em a ti thung a.
“Modiji, i hlau a nih kha? Adani leh Ambani te nen hian kawngkhar hnan chungin in inhmu thin tlangpui a. Tun hi mipui hriata Adani leh Ambani te hming i lam vawikhatna a ni. Sum tam tham tak an pe thin che tih i hre bawk a, i mimal thil tawn zawk a ni,” tiin Rahul Gandhi chuan a sawi thung a. “Thil pakhat ti teh – CBI, ED te uluk takin chhuitir la, hlau suh,” tiin a sawi ve thung.
“He ram hian BJP te tempo of corruption driver leh helper te an hre khawp mai” tiin Rahul Gandhi chuan a sawi bawk a.
Gandhi chuan Modi an heng sumdawng lian pahnihte hnena sum a pek chu Congress te chuan a pek zat chiah India mipui te hnenah scheme hrang hrang party in an tiam ang hmangin an pe ang a ti bawk.
‘Hun a inthlak’
“Hun a inthlak ta. |hiante pawh thian an ni ta lo! Inthlan thawh thumna a zawh meuh chuan vawiinah Prime Minister chuan a thiante ngei a bei ve ta. Thil chiang tak chu Modi chair chu a nghing a ni” tiin Congress President Mallikarjun Kharge chuan X ah a post zui bawk a.
Congress general secretary (communication) Jairam Ramesh pawhin X ah vek post siamin April 3 atang khan Rahul Gandhi chuan a thusawiah Adani tum 103 leh Ambani hming tum 30 a lam tiin a sawi bawk a.
“He inthlan tuifawn hi a turu em mai a “Pappa” of “Hum Do Hamare Do” chuan fate a bei ta. A party tana Electoral Bonds Rs 8,200 crore la tu, Supreme Court meuhin constitutiona kalh a tihsak chuan vawiinah midang te a puh ta a nia” tiin Ramesh chuan a sawi bawk a.
Congress general secretary Priyanka Vadra pawhin Prime Minister chuan tunah chuan mipui ten a sorkar chuan sumdawng lian te hausakna tipungin tun hnai kum 10 chhungin billionaire te leiba Rs 16 lakh crore a ngaidam tih an hrefiah tawh tih a hria a ni a ti bawk.