Rahul Gandhi ‘vote ruk’ aupui India ram mipuiin an thlawp tha – Dr Lalmalsawma

Tunlaia India ram politics titi lian ber – Vote Chori (Vote ruk) a aupui avangin Congress hruaitu Rahul Gandhi chu ram mipui thlawp a hlawh hle a, a boruak a kang chak hle niin MPCC hruaitu Dr Lalmalsawma chuan a sawi a. Electoral roll tihchingpen ni ngeia ngaih theih a tam avanga Election Commission of India laka lungawilohna chu Mizoramah pawh vawiin – September 4 hian Congress party chuan an nei dawn tih a sawi.
MPCC treasurer Dr Lalmalsawma Nghaka sawi danin, electorall roll tih chingpen nia ngaih finfiahna tur hi CCTV leh inthlan kaihhnawih hmanrua hrang hrang RTI dan hmanga dil pawh ECI chuan a pek duh loh avangin, an rinhlelhna ber Bangalore Central Lok Sabha seat hnuaia MLA bial pakhat – Mahadevapura Assembly constituency chu Rahul leh a team-te hian thla 6 chhung an zirchiang a, vote 100250 a chingpen ngei niin an ngai tih a sawi.
Duplicate voter 11960, address lem leh awmlo 40009, address thuhmuna vote tamtak inthlauhna 10452, thlalak mumal awm lohna voter 4132, diklo taka form-6 hmanna vote 33692 a ni tih sawi a ni.
Hei bakah hian Maharastra Assembly biala inthlanah thla 6 kaltaa Lok Sabha inthlana vote nei zat aiin State Assembly inthlanah vote nei mi nuai 50-in an tam zawk a, thla 6 chhunga vote nei thar hi kum 5 kalta chhunga vote nei thar aiin an tam zawk tih a sawi. Hei mai ni loin, vote thlak theih hun tawp – tlai dar 5 hnu ah vote nuai 65 a tla a, a ti rinhlelhawm zual hle tih a sawi bawk.
BJP-in Election Commission a thunun hle niin opposition party chuan an ngai tih MPCC hruaitu hian sawiin, tuna chief election commisioner Gyanesh Kumar chu BJP sawrkarin dan tidanglama a ruat a ni a; CEC leh Election commissioner-te hi member pathum awmna committee – Prime minister leh leader of Opposition bakah Supreme Court Chief Justice-in an ruat thin laiin, BJP sawrkar chuan Chief Justice hi a telh duh loa, a aiah Home minister Amit Shah an ruat tih a sawi a ni.
Bihar Assembly inthlan tura electoral roll ennawn leh tih that mekah pawh thil diklo tam tak hmuhchhuah a ni tawh tih a sawi bawk a. Hengte avang hian mi thenkhatin Supreme Court-ah ECI an khing mek a. SC hian ECI hi draft roll leh number tarchhuak thuai tur leh roll atanga an paih ho paih an nih chhan mumal tak tichhuak turin thu a pe a, party tin aiawh hearing-a tel turin thu a pe tih a sawi a ni.