Raje-in Ashok Gehlot thusawi na takin a hnawl

Rajasthan Chief Minister Ashok Gehlot-an Dholpur-a thusawina a neih atangin a leader chu Sonia Gandhi ni lovin Vasundhara Raje zawk a ni tih a chiang a ni, tiin Sachin Pilot chuan na takin a party pui chungchang a sawi.
Sachin Pilot chuan Gehlot-an Pathiannia thusawina a neiha kum 2020-a a laka lungawi lo Congress MLA te chuan Amit Shah hnen atangin sum an dawng a, an pe let tur a ni a tihna pawh a hnawl thu a sawi bawk a.
Gehlot deputy ni reng thin Pilot chuan eirukna duh lohna ‘Jan Sangharsh Yatra’ chu Ajmer atanga Jaipur thlengin May 11 atangin a kalpui dawn a.
“Dholpur-a chief minister thusawi ka ngaihtlak atangin kan CM leader chu Sonia Gandhi ni lovin Vasundhara Raje Scindia zawk a ni,” tiin Pilot chuan a sawi.
Pathianni khan Gehlot chuan kum 2020-a Congress MLA te a laka an hel chunga a sorkar a tluklohna chhan chu BJP leader Vasundhara Raje leh Kailash Meghwal tena phiarrukna hmanga sum hmatheha mipui thlan sorkar paihhtlak an duh loh vang tiin a lo sawi tawh a.
Pilot chuan Congress leader pui te laka puhna huaisar tak tak kalpui chu thil tihawm leh mawi a ni lo a ti a. “A demawm a, dawt leh behchhan nei lo a ni” tiin a sawi.

-- Advertisement --

Gehlot thusawi Raje-in hnawl
Pathiannia Ashok Gehlot thusawi chu thawhtanni khan Senior BJP leader leh Rajasthan Chief Minister hlui ni bawk Vasundhara Raje chuan Gehlot-an amah leh BJP leader pahnih ten kum 2020-a Congress MLA te tihtauh laiin a sorkar an humhimsak tih chu ‘awm ang lo leh dawt’ tiin a sawi thung.
“Gehlot hian kumin Assembly inthlan turah a chak loh a hlauh avangin dawt a sawi a ni. Min fak vak hi inphiarrukna lian tak a ni a. Ka nunah hian Gehlot aia min ti hmingchhe nasa an awm lo,” tiin Raje chuan a sawi a. Kum 2023 Assembly poll-ah chak loh a hlauh em avangin trick hrang hrang a kalpui mek a, a hlawhtlinpui dawn chuang lo tiin a sawi.
Raje chuan Gehlot-an kum 2020 khan a sorkar paihthlak a nih theih nan Union Home Minister Amit Shah chuan rebel Congress MLA te hnenah sum crore tel a pe a tih chu dawt tia sawiin, “A rinawm leh dikna hriat lar Amit Shah dik lo takin a puh a ni,” tiin Raje chuan a sawi bawk a.
“Mi tham leh thamna lak hi dan bawhchhiatna ve ve a ni a. An MLA tena thamna sum an dawng a nih chuan an lakah FIR theh luh tur a ni,” tiin Raje chuan a sawi bawk a.
“Horse-trading lamah chuan Gehlot hi heti lama mithiam a ni a. Kum 2008 leh 2018 inthlanah khan Congress te minority an ni chungin sorkarna inlei leh hralh hmangin a siam a ni,” tiin Raje chuan a sawi bawk.
Rajasthan Chief Minister hlui leh BJP leader ni bawk Vasundhara Raje chuan khang kum inthlanah khan BJP emaw Congress ten emaw sorkar siam turin majority an nei lo ve ve a ti a.
“Duh ila chuan sorkar kan siam thei ang chu, mahse, BJP principle kalh a ni dawn a, kan duh lo a ni,” tiin Raje chuan a sawi bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More