Rajya Sabha MP K Laltluangkima

Mizoram-in Rajya Sabha member seat khat a neih chu Ningani khan State Legislative Assembly member-ten an thlang a, ZPM candidate K Laltluangkima thlantlin a ni.
Vote hi Mizoram State Legislative Assembly Secretariat Annex-ah thlak a ni a, chawhma dar 11.21 ah thlak zawhfel niin, MLA 40 awmah 36-in an thlak a, ZPM MLA zingah 26-in vote thlakin, MNF MLA 10-in an thlak bawk a. MLA pahnih nei BJP leh MLA pakhat nei Indian National Congress chuan vote hi thlak loin an ‘hai’ a ni.
MLA 27 nei ZPM atangin damlohna avangin W Chhuanawma chuan vote a thlak thei loa, party election hotute chuan ‘home voting’ a tih theihnan an dil sak a, remtih sak a ni lo thung.
ZPM Legislative Party leader, chief minsiter Lalduhoma chuan, vote thlakna hmuna thuthar thehdarhtute zawhna chhangin, an MLA zingah party dang candidate vote tum awm anga sawi chu eptu party-te thu sawi dik lo a ni tih a sawi a. Chutiang boruak an nei lo tih a sawi a ni.
Vote hi tlai dar 5.00 khan Election Commission of India atanga phalna hmuh a nih hnu in chhiar a ni a, result hi fax-in ECI thawn a ni a, ECI hian result puan phalna a pek hnuah returning officer, Mizoram Legislative Assembly commissioner & secretary Zothansanga Ralte chuan zan dar 7.00 vel khan Khiangte Laltluangkima hi Rajya Sabha MP atan thlantlin a ni tih a puang a ni.
Thuthar thehdarhtute zawhna chhangin K Laltluangkima chuan, sawrkar nena thawk dun tur an ni a, state sawrkar hmachhawp a hlawhtlin theihnan central-ah theihtawp a chhuah thin dawn tih a sawi a. Lok Sabha MP Pu Richard Vanlalhmangaiha thutna lam tho chu a thutna tur a ni dawn tih sawiin, vote thlak ngaiah chuan ‘issue base’ a vote an thlak tur thu a sawi a ni.