Thawhtannia Union Budget Session chu tan tirh phat atangin Opposition ten sorkar chu Congress leader Mallikarjun Karge leh Rahul Gandhi a te thusawi nawh reh a nih chungchangah lungawi lovin an bei zui nghal a. Hei bakah MP Rajani Patil suspend a nihna leh Adani group te chhui chian an phutna boruakin a khat a ni.
-- Advertisement --
Session neih a nih hmain Leader of Opposition, Rajya Sabha Mallikarjun Kharge chuan opposition party te ch kokhawmin Upper House-a an chet lak dan tur sawihona a neihpui bawk a.
Kar kalta khan PM Narendra Modi chuan House pahnihah President address-a Motions of Thanks sawihonaah thusawi a nei tawh a, mahse, Hindenburg-Adani chungchang kaihhnawihah opposition te chuan an auel char char thung.
Budget Session hi January 31-a tan kha niin Budget paper pharh te bihchianna hun siam a nih hnuah March 13 ah daih neih leh chauh tur a ni a. Union Finance Minister Nirmala Sitharaman chuan February 1 khan Union Budget 2023-24 chu a lo pharh tawh a ni.
Rajya Sabha tan a nih veleh minister te chuan paper pharhin business pangngaia kal turin chet an la a. Mahse, Opposition MP te chuan Chairman Jagdeep Dhankhar hnenah notice pe lutin chu chu chairman chuan order a tel lo tiin a hnawl sak a.
Opposition member te chuan lungawilohna lantir zuiin chu chuan rorel pangngai kalpui thei lovin a siam zui a, MP thenkhatte chuan Chair chu LoP tal thusawi phasak tura an tih pawh Dhankhar chuan a hnawl sak bawk.
Leader of Opposition Mallikarjun Kharge chan Rajya Sabha Chairman Jagdeep Dhankhar an a thusawi te nuaibo tura thupek a pe chu a lawm loh thu sawiin hei leh MP Rajani Patil suspend a ni chu an lawmloh thu a sawi a.
Mahse, Chairman chuan Kharge thusawi an nuaibo tak chu nawhreh hlen a nih tur thu sawiin LoP in Chair a puhna te chu pawm theih loh a ti thung a.
“LoP ber hian tum tam tak Chair chu pressure hnuaia che tiin i sawi a, i thusawi te kha nuai reh a ni. Chair hi pressure hnuaiah a awm i tih chhung chuan House floor a thu i sawi theihna i bansan zel a ni” tiin Chairman chuan a chhang a ni.
Rorel hleithei lova siam a nih hnuah House chu tihtawp lai lawk a ni a, chhun dar 11 ah tan leh tura tih a ni a. Tihtawp lailawk a nih hma in House Well a chhuak khawm MP – Raghav Chaddha, Imran Pratapgarhi, Sanjay Singh, Shakti Singh Gohil, Sandeep Pathak leh Kumar Ketkar te chu Chairman chuan a vau lawk zui bawk.
House thutkhawm leh hnuah pawh Opposition te chuan Chairman chu MP Rajani Patil suspend chu sut turin an ngiat a. Chutih laiin Union Minister Piyush Goyal chuan oppotiion te chu PM Narendra Modi an President address Motion of Thanks a chhanlet laia an chet dan tuihnai lo lutuka ngaihdam dil turin a phut ve thung.
House rorel thei lova a awm zui tak zel hnuah Chairman Jagdeep Dhankhar chuan, “Hun tam tak kan paih ta a. House hi tihbuai a nih zel chuan mipuite phutluih angin chet ka la ang,” tiin a sawi zui a, March 13 a thutkhawm leh turin a titawp zui a ni.
“Opposition ten Rajya Sabha tha taka rorelna kalpui an remti lo. Chair zah lovin an tibuai zui char char a. Opposition te hian sawihona tha awm thei lova tibuai hrim hrim turin House an kal a ni” tiin Union Minister Piyush Goyal chuan a sawi zui bawk.