Raltlan 27,000 chuang awm mek Raltlan awm belh leh thut thei
Myanmar a\anga raltlan, Mizoramah mi 27,000 chuang an awm mek a, Myanmar lam dinhmun enin raltlan hi an awm belh thut thei nia ngaih a ni.
2021 February ni 1-ah Myanmar-ah sipaiin sorkar lai paih thlain sorkarna an pawng lak a, sorkar sipaite leh mipui lam an inbeih zui avangin mi engemaw zat chu hmun hrang hrangah an tlanchhia a ni. Mizoramah pawh raltlan an awm nghal a, 2021 hnuah hian Mizorama lut thar an awm deuh reng.
Mizoram Police te chhinchhiah danin, October ni 31-a Myanmar atanga raltlan, Mizorama awm zat chu 27,905 a ni a, an tam berna Champhai district-ah mi 13,567 an awm.
2021-a raltlan an awm tirh atangin raltlan awm zat hi a danglam deuh reng a, lut thar an awm rualin kir leh an awm deuh reng bawk. Kuminah pawh kir leh hi an awm deuh reng a, a hma kha chuan raltlan zat hi sing thum chuang fe a ni deuh reng zawk.
Kuminah mahni khuaa kir leh an awm rualin lut thar pawh an awm tho a, police-te chuan Mizorama lut hnuhnung berte chu July ni 10-a mite an ni an ti.
Raltlante chuan lut thar hi awm leh thut theiah an ngai a, Myanmar lam buai dan azirin mipui an tlanchhe leh thut theiah an ngai.
Myanmar-a rorel mektu sipai sorkarin November ni 28-a inthlan buatsaih an tum a, hei hi mipui lamin an pawm loh avangin, sipai sorkar hian tihluihna leh tharum a hmang mek. Hmun hrang hrangah mipui a rum thaih bakah anmahni paih tuma ralthuam lektu, mipui sipai an tihte an bei nasa a, Zo hnahthlakte awmna velah sorkar sipaite hi an che a nih chuan Mizoramah an tlanchhe leh ang tih chu an thlir dan a ni.
Tahan leh a chhehvela chengte pawh tunlai hian a hma aiin an ralmuang lo a, hmun danga biru te pawh an awm tih thu dawn a ni.
Raltlante sawi danin, tunlaiin sipai sorkarin tharum a hmang nasa a, indo thlawhna hmangin hmun hrang hrang a bei thin. Indo thlawhna hmanga beih hi Zo hnahthlakte awmna velah chuan a thleng rih lo a, mahse a thleng ang tih hlauvin mipui lam chu fimkhur takin an awm. Beih an ni ang tih hlau reng rengin an awm a, sorkar sipai lam an che a nih chuan mipui chu Mizoramah an tlanchhe leh thei an ti. Raltlante hi chutianga an buai thut avanga tlanchhe ta thut an ni tlangpui a, tuna Myanmar lam dinhmun thlirin chutiang chu a thleng leh ang tih hlauhna a awm a ni.
Myanmar a\anga
raltlan zat
District Raltlan
Aizawl 4303
Champhai 13567
Hnahthial 540
Khawzawl 359
Kolasib 166
Lawngtlai 1141
Lunglei 1563
Mamit 261
Saitual 188
Serchhip 734
Siaha 5083
Total 27,905