Raltlan chhuahtirte chin hriat ni rih lo

Bangladesh atanga Mizorama raltlan, Myanmar lam pantirte chin hriat a ni rih lo a, an kal tumna khua an la thleng lo tih thu dawn a ni.
January ni 11 khan Bangladesh atanga Mizorama tlanchhia, Zo hnahthlak mi 28-te chu Myanmar pana chhuahtir an ni a, Myanmar-ah hian Zo hnahthlak khua Samang pan an tum. Mahse Samang hi an la thleng lo.
Thu dawn danin, buhfai leh a chhumna tur bungbel vel an nei a, biscuit an pai bawk.
Raltlanah hian puitling mipa pariat leh hmeichhia panga an awm a, mi dang 15 chu naupang an ni a, nausen pakua an tel tih thu dawn a ni.
Bangladesh-a Chittagong Hill Tracts atangin Lawngtlai District an lut a, Lawngtlai district-a Vathuampuiah lutin, chuta tang chuan Hruitezawlah an kal a, heta an awm lai hian Assam Rifles-in an man tih thu dawn a ni.
Assam Rifles hian Tuithumhnar-a an camp-ah kar khat vel an kawl a, January ni 10-ah chhuahtirin, Tuithumhnar-ah hian an awm dawn tih hriattir an ni a, zan lamah khawtlang hruaitute pawhin an awmna turte an ngaihtuah nghal. Mahse a tukah an man khawm leh ta a ni.
Thu dawn danin, Zorinpui-ah hruaiin Myanmar pantir tum an ni a, Arakan Army-in an remtih loh avangin Kakichhuah atangin Myanmar pantir an ni ta a ni. Hetia chhuahtir an nih lai hian Mizoram sorkar official-te leh Mizoram Police te pawh an awm ve tih thu dawn a ni.
Myanmar-a Samang khua hi Zo hnahthlak khua a ni a, kum hmasa lamah pawh khan Bangladesh atanga Mizorama tlan luh tum mi thenkhat chu an beidawn avangin Samang-ah hian an lo lut rawih tawh.