Doctor enkawl loha thihnaah lungawilo Health department-in chhuichiang dawn

Doctor enkawl loha thihnaah lungawilo
Health department-in chhuichiang dawn
Tunhnai khan District Hospital Siaha pantu tlangval pakhat chu darkar 24 chhunga doctor enkawl loha awm hnu ah a nunna a chan a, he thilah hian a chhungte auchhuah hnu ah an awmna veng tlawmngai pawl chuan hma la zuiin, sawrkarin he thil hi chhuichiang a, a tuartute hnenah hian zangnadawmna pe turin an phut a. Health department chuan chhuichiang turin mi an inruat a ni.
Joint NGO New Siaha thuchhuah danin, 2025 January 9 zan dar 8.00 vel khan Daniel Lalruatfela (24) c/o Lalsawmliana Ralte, New Siaha chu pum na vangin District Hospital Siaha-ah lut a. Hetihlai hian doctor duty a awm loa, nurse-ten an thiam ang tawka an enkawl hnu in in lamah hawpui leh a ni. A natna hian zual lam a pan zel avangin January 10 zing dar 3.00 velah damdawi inah hruai leh niin, a hma ang thoin doctor on call hmel hmuh tur a awm loa, rei tak na tuara a awm hnu in, January 10 chawhma dar 10.57 ah a thi a ni.
He thil thlengah hian veng mipuiin lungawi har tiin, Joint NGO chuan ngawihbopui har a ti a. Thuneituten he thihnaah hian a mawhphurtu zawngchhuak a, dan anga a phu tawk hremna pe turin an phut tih a sawi.
‘Hun kal tawh chhuikirin, District Hospital Siaha hian thawktu thenkhat inthlahdah avangin hmingchhiatna neuh neuh a lo nei tawh thin a. Doctor on call-a duty pawhin chhuanlam siama kal loh an ching thin hle. Hetianga District Hospital a hmingchhe leh thin hi pawi kan tiin, hospital awmna veng New Siaha mipui pawhin mualphothlak kan ti a. District Hospital Siaha-ah hian thawktu fel leh hawihhawm tak tak awmin, damlote hmangaih leh duat takin an enkawl thin tih kan hria a. Chutihrualin thawktu thenkhat, mahni damlote ngaihsak miah lo leh damlo chhungte tan pawh biak ngam loh mi tlemte an la awm hi vanduaithlak kan ti hle,’ thuchhuah chuan a ti.
Tun hnuah hetiang thil duhawm lo hi thleng nawn tawh lo turin hospital-a thawktute an ngen tih sawiin, mahni duty ngaipawimawh a, theihtawpa Siaha mipui tan thawk turin an ngen tih a sawi a. ‘Doctor leh thawktuute inthlahdah avanga nunna chan kan awm leh a nih chuan a na thei ang berin hma kan la dawn a. Daniel-a chhungte hnenah hian zangnadawmna pe ngei turin Mizoram sawrkar kan phut a ni,’ Joint NGO New Siaha chuan a ti.
Hemi chungchangah hian January 16 khan Health & Family Welfare principal director chuan Directorate of Health & Medical Education deputy director (admin) Ralhmingthanga leh Civil Hospital Lunglei atangin Dr Joseph L Chawngthu chu Siaha-ah hian rang taka kal a, he thil thleng hi chhuichiang tura tihna a tichhuak a. Ni 5 chhunga an thil chhuina report thehlut turin a ti a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More