Raltlan kir chhunzawm, sumdawnna pawh chhunzawm tawh

Tun hnaia Myanmar atanga Mizorama raltlan engemaw zat an kir leh mek a, Thawhlehni pawh khan kir leh an awm nual.
Myanmar lama an inkah avanga raltlan an awm rual hian Zokhawthar velah |iau kana insumdawn tawnna pawh a chawl nghal a, Thawhtanni khan sumdawnna pawh hi an chhunzawm leh ta e.
Champhai District-a Zokhawthar bul |iau lei, Mizoram leh Myanmar lam inkalpawhna chu nikum July ni 25 atang khan India sorkar thuin khar a ni a, zalen taka inkalpawh theih a ni tawh lo. Phalna neite chauhin |iau hi an kan thei tawh a, gate-ah hian kawng zim te hawn niin, chutah chuan sumdawnna bungrua pawh an luhpui thin. July thla tir lamah Myanmar lama an inkah avangin sumdawnna pawh chu a chawl a, July ni 14-ah an insumdawn tawn leh tan.
Police te’n an chhinchhiah danin, Thawhtanni khan raltlan hi 262 an kir. Inrinni atang khan an kir tan a, a ni khatnaah hian mi 2319 an kir. Chawlhni khan mi 126 an kir a, Thawhlehni khan tlai dar 5 thlengin mi 46 an kir.
July ni 14-ah hian |iau kana insumdawn tawnna pawh an chhunzawm a, tun hnaia an buai chhunga bungraw tangte an inpe tawn.
Zokhawthar atanga thu dawn danin, Myanmar lam atangin Zokhawthar-ah eitur chi hrang hrang a lut a, Zokhawthar atangin chini, tel, artui leh thil dang thenkhat Myanmar lamah a lut bawk.
Zokhawthar bul Myanmar lam an ralmuang tawh a, chuvangin raltlante pawh an kir a ni. Amaherawhchu, kir rih lo pawh an la awm a, an dinhmun han ngaihchan deuh rih duh vanga kir rih lo engemaw zat an la awm tih thu dawn a ni.