Raltlan lut thar awm lo

Kar hmasa lamah Myanmar-ah an inkap a, Chawlhni liam taah pawh khan an la inkap. Hei vang hian Mizoramah mi engemaw zat an raltlan a, Nilaini kha chuan raltlan lut thar an awm ta lo nia ngaih a ni.
Mizoram Police te’n July ni 9-ah raltlan lut thar an awm loh thu an sawi a, tun tuma an buai hnua raltlan lut thar an awm loh ni hmasa ber a ni.
An la buai a, inkap hi chu an la awm a, mahse tlan chhuak an awm lo a nih hmel, police-te chuan an ti a, Thawhlehni zan pawh khan Leilet-ah inkap an la awm tih an sawi bawk.
Mizoram Police te’n an chhinchhiah danin, tun tum buainaa Mizorama tlan lut hi, Zokhawtharah mi 3524, Saikhumphaiah mi 720 tiin an chhinchhiah a, hetah hian naupang an tel loh bakah chhinchhiah hman loh engemaw zat an awm turah ngaih a ni bawk.
Raltlan tam berna Zokhawtharah chuan raltlan hi sing an tlin thuak an rin thu an khawtlang hruaitute’n an sawi a, chhinchhiah loh i thahnem tak an awm thu leh naupang pawh thahnem tak an awm thu an sawi.
Zokhawthara raltlan tam ber chuan an chhungte an bel a, belh tur nei lote chu hall remchangah awmkhawmtirin, khawtlangin an ei tur an ngaihtuahsak a ni.
Raltlan awm sa an awm bawk a, a awm sate hi chu in luaha khawsa, ngaihtuah ngai lo an ni.
Saikhumphai lama tlan lutte hi Leilet inkahna vanga tlanchhia an ni a, Leilet-ah hian CNDF leh CNA an inkap a ni. Saikhumphai leh a bul khaw thenkhatah an lut a, hmun khatah an chhinchhiah nia hriat a ni.