Raltlan thenkhatin haw leh na tur chuang nei tawh lo

Raltlan thenkhatin haw leh
na tur chuang nei tawh lo
Raltlan thenkhat zingah anmahni khaw lama haw leh na tur chuang nei tawh lo, Mizorama awm hlen duh an awm tih sawi a ni.
Kolasib district huamchhunga raltlan dinhmun ngaihtuahin district bawrhsap Robert C Lalhmangaiha hoin raltlan awmna khawtlang hruaitute an thukhawm a. Bawrhsap chuan Kolasib district-a raltlan awmte felfai taka chhinchhiah an ni tih sawiin, anmahni felfai taka enkawl dan tur ngaihtuah chu thil pawimawh a ni tih a sawi.
Saipum, Thingdawl, Bilkhawthlir leh Khamrang khawtlang hruaituten an khua theuha raltlan dinhmun report an pe a. Thingdawl Polytechnic building-ah Manipur atanga raltlan chhungkaw 11 awmin, Saipumah chhungkaw 36, Bilkhawthlirah chhungkaw 6, Khamrangah Myanmar atanga raltlan chhungkaw 17 an awm.
Raltlan zingah hian mahni khuaa haw leh mai duh thenkhat an awm rualin, a bikin Manipur atanga raltlan thenkhat chu haw na tur pawh nei tawh lo leh Mizorama awm hlen duh chhungkua an awm nual tih sawi a ni a. Heng mite hian a tlangpuiin anmahnia eizawnna indapin mi hnena inhlawh chawpin ei an zawng ve thin tih sawi a ni.
Thutkhawmah hian Manipur atanga raltlan chu sawrkar laipuiin refugee-ah a pawm loa, chuvangin anmahni chhawmdawlna tur hi central atangin ruahmanna a awm lo tih sawi a ni. Mizoram sawrkar ngenna avangin hun engemawti chhung atan sawrkar laipuiin an tan buhfai a pe a, hei hi tunah chuan a tawp tawh a sawi a ni.
Raltlante harsatna tawh hrang hrang sawi a ni a. Harsatna an tawh lohnan furpui thlen hmaa an chenna thawmthat ngai lai en a, thuneitute inrawnkhawmin a tul dan azirin silpouline ngaihtuahpui nise, an ti. Raltlante awmkhawmna hmunah a thlawna ei leh in pek a remchang tawh lo nia an ngaih thu sawiin, danin a phal chinah anmahniin eizawnna an indap thei a nih chuan remtihpui nise an ti a, anmahni duhthua an khaw lama haw duh an awm a nih chuan an haw dan tur ngaihtuahpui nise an ti bawk.