FMR thiah leh ramri hung tum
dodal turin chief minister ngen
Zo Reunification Organisation chuan India leh Myanmar zalen taka inkalpawh theih chin siam – free movement regime India sawrkarin a thiah tak leh ramri hung a tum chu na taka dodal turin chief minister an ngen.
ZORO Gen. Hqrs hruaitute chuan chief minister Lalduhoma an hmu a. India sawrkarin FMR thiat a, ramri hung a tum chungchangah Mizoram sawrkarin ram pe lo tur leh ramri hung hi do a, FMR pawh a nihna anga dah let tura theihtawp chhuah turin an ngen. Chief minister chuan FMR thiat a, Indo-Burma ramri hung chu Mizoram sawrkar pawhin a duh loh leh a dodal a ni, tiin, hemi chungchangah hian ZORO chu theihtawp chhuahpui a tum tih a sawi a ni.
ZORO chuan UN Declaration on the Rights of Indigenous People’s Article 36 (a) leh (b) kalha India sawrkarin Zofate (indigenous people) inkara daidanna bang siam a tum leh FMR kan neih tawh sa thiata chet a la chu a dem tih a sawi nawn a. FMR hi a nihna anga dah let a, ramri pawh hung lo turin a tawp thlengin India sawrkar hmalakna hi nasa lehzuala dodal a tumin a inbuatsaih mek tih a sawi a. Zofate inpumkhatna atan leh kan ram leh hnam tana tha tura ZORO hmalakna chu Zofa zawng zawngin thlawp turin a ngen tih a sawi a ni.
FMR thiah leh ramri hung tum dodal turin chief minister ngen
Get real time updates directly on you device, subscribe now.
Next Post