Raltlan zinga 37% naupang, 44% hmeichhia

Bangladesh-a Chittagong Hill Tracts atangin
Mizoramah mi 700 chuang an raltlan a, an zinga 37% chu naupang niin, 44% chu hmeichhia an ni.
Chittagong Hill Tracts atanga Mizorama tlanlutte hi Lawngtlai district khaw hrang hrangah an awm a, Lawngtlai bawrhsap office-a an chhinchhiah danin an vaiin mi 772 an ni.
Bawrhsap office-a an chhinchhiah danin, mi 772-ah hian naupang 290 an awm a, mipa 168 leh hmeichhia 122 an ni.
Puitling 430 an awm a, mipa 208 leh hmeichhia 222 an ni.
Lawngtlai district-a khaw pakua, Mautlang, Chamdur P, Vathuampui, Parva III, Hruitezawl, Hmawngbu, Hmunnuam, Tuithumhnar leh Bungtlang South-ah te an awm.
Mizoram sorkarin Bangladesh atanga Mizorama lut raltlan naupangte chu sikul kaltir a duh a, an awmna khua theuhvah hian sikul kaltir an ni. Sikul kal lo an awm em tih hriat a ni lo a, an kal tlangpui tih chu hriat a ni.
Khaw thenkhatah phei chuan sikulah a khaw mi aiin raltlan naupang hi an tam zawk a, raltlante luh khawm thinna Parva III-ah pawh primary school-a pawl tinah a tam zawk chu raltlan naupang an ni.