Raltlan zirlai 6600 chuang Mizoramah
Myanmar leh Bangladesh a\angin Mizoramah mi engemaw zat an raltlan a, Manipur-a Zo hnahthlakte pawh Mizoramah an tlanchhe mek. An zinga naupang, sikul kal rualte’n Mizoramah zirna an chhunzawm a, Mizorama sahimna zawnga tlanlut zirlai hi mi 6642 an ni.”Mizorama rawn tlanchhiate hi kan unaute an ni a, zirna chhunzawm turin kan duhsak a, Mizoram sorkarin hnam tan a ni e tiin sikul kal rual chu sikul kaltir a tum a ni,” tiin education minister Lalchhandama Ralte-in The Aizawl Post a hrilh.
School education department-in an chhinchhiah danin, Myanmar a\anga raltlan zirlai 4806 an awm a; a hma chuan mi 6700 vel an ni a, mahse mahni khuaa kir leh an awm avangin, tun hnaia an inchhiarnaah a hma aiin an lo tlem a ni.
Nikum kum tawp a\angin Bangladesh-a Zo hnahthlakte Mizoramah an raltlan ve leh a, anni lamah hian Mizorama sikul luhtir mi 333 an awm. Thla hmasa a\angin Manipur a\angin Mizorama tlanchhia an awm a, anni-ah hian Mizorama sikul luhtir mi 1503 an awm. Chu chu education department chhinchhiah dan a ni.
Mizoram sorkar hian uniform leh zirlaibu a tumsak a, mid-day meal an dawng bawk. Amaherawhchu, Manipur a\anga lutte hi an la tharlam em a, admission ti chauh te an nih avangin uniform leh zirlaibu hi chu an dawng nghal vek rih lo tih an sawi.
Education minister Lalchhandama Ralte chuan an sahimna zawnga Mizorama lutte hi Mizoram sorkarin kawng hrang hranga a tuamhlawm thu a sawi a, “Mizoramah nationalist sorkar a ding a, he sorkar hi hmun hrang hranga Zo hnahthlakte tan a ding a, Zo hnahthlak zawng zawngte sorkar a ni. Chuvangin kan unaute hi kawng hrang hrangin a tuamhlawm a, zirna pawh chhunzawmtir a tum a ni,” a ti.
“Kan unaute’n lehkha an zir hian anmahni tan chauh ni lovin hnam tan a hlu a, kan hnamin hma a sawn zel theih nan sikul pawh kaltir an ni a. Hmun hrang hranga Zo hnahthlakte’n hma kan sawn tur a ni,” a ti bawk.
“Hemi kawnga department-a thawkte leh khawtlang mipuite \hahnemngaihnaah lawmthu ka sawi a. Kan unaute tana kan \angrual hi a lawmawm tak zet a ni,” tiin lawmthu a sawi.