India rama nurse chawimawina sang ber – National Florence Nightingale Award dawng zingah Mizo nu C Zopari a tel a, India President Droupadi Murmu hnen atangin Ningani khan New Delhi-a Rastrapati Bhavan-ah a dawng.
Aizawl Dinthara cheng, ward superintendent (Rtd) C Zopari hian kum 1985 khan School of Nursing Civil Hospital Aizawl atangin GNM a zir zo a. 1986 atanga staff nurse hna thawk tanin, Mizoram hmun hrang hrang – Buarpui PHC, Chhingchhip PHC, District Hospital Siaha leh Civil Hospital Aizawlah te post a ni. 2016 August-ah ward superintendent-ah promotion a hmu a, District Hospital Kolasib leh Civil Hospital Aizawlah kum 37 chhung a thawh hnu in kumin March 31 khan superannuation pension-in a chhuak a ni.
A service lai hian tum hnih nunna chan mai hlauhthawn awm naute chu nursing-a a thiamna leh tawnhriatna hmanga chhanchhuah leh nunna chhanhim a nei a, puitling pakhat pawh hetiang dinhmuna ding tawh hi nunna chhanhim a nei bawk. 1994 April 14 khan Chhingchhip PHC-ah nu nau vei, chau tak leh nikhaw hre loa awm tawh, Aizawl lam pan thei si lo, nu pum chhunga naute leh a lungphu chiang tawh bawk silo chu huaisen tak leh thiam takin April 17-ah naute hi a chehchhuah sak (forceps delivery) a, nu leh naute nunna a chhanhim a ni. He naute hi tha taka dam chho in tunah hian kum 29 mi niin pasal a nei a, a nu nen hian an la dam a ni.
Nurse hna pangngai a thawh piahlamah, mihring nunna chhanhimnaa a thawh hlawkna avang hian National Florence Nightingale Award 2023 hi hlan a ni.
Nurse chawimawina sang dawngtu zingah Mizo nu
Get real time updates directly on you device, subscribe now.
Prev Post