Raltlanten lo an neih theih dan tur ruahmanpui dawn

Bangladesh sipaiten Chittagong Hill Tracts-a military operation an neih avanga inkahna thleng kaihhnawiha November 2022 leh a hnulama Bangladesh atanga Lawngtlai district-a sahimna zawnga tlanlutte dinhmun leh anmahni chhawmdawl leh enkawl zui zel dan tur chu Nodal Officer for Bangladeshi Asylum Seekers, DRDO project director Marilyn Rualzakhumthangi hoin sawi a ni.
District administration leh sawrkar department official-te, Bawm Students’ Association, Pang Zirlai Pawl leh Central Young Chakma Association aiawhte an tel a. Lawngtlai district-a Bangladesh atanga raltlante dinhmun tlangpui sawi niin, district administration atanga chhawmdawl leh enkawl kawnga hmalak tawh chin sawi a ni. Raltlanten pawl, kohhran leh mimal atanga chhawmdawlna an dawn dan an hriat theih chin report a ni bawk.
Sahimna zawnga raltlan luhbelhte an awmna khua tan phurrit a nih loh na’n awmze nei leh zangkhai pui zawk tura an awmna hmun ruahman te, raltlante ei leh bara an intodelh theihna’na lo leh huan an neih theih dan tur leh thlai chi ngaihtuah sak chungchang leh, inhlawhna an neih theih dan tur bakah hun rei zawk thlira raltlante chhawmdawl leh enkawl zui nana thil pawimawhte sawi ho a ni.