“Ram chhanchhuak turin ‘politician lo’ an tihte kan rawn penchhuak”

Ram tluchhe mek tungding turin mi tam takin politician lo an tihte, Pu Lalsawta hoin Congress party an rawn penchhuak tih Congress MLA Lalrindika Ralte chuan a sawi.
A bial, Hachhek bial khaw hrang hrang a fannaah Lalrindika Ralte chuan ram dinhmun that loh thu a sawi a. Sawrkar hnathawkten a hun takah hlawh an la thei loa, dan pawisak lohna a lianin eirute an zalen a; hetiang zela kan ram a kal chuan chhanchhuah tlak loh khawpin a awm thei tih a sawi.
“Chumi chhanchhuak tur chuan, keini tawngkam thiam lo, mi tam takin a politician lo an tihte Pu Lalsawta hoin kan rawn penchhuak a. Kan ram siamtha tur hian theihna kan nei a, chu chu duham loh hi a ni. Sawrkar sum hi mipui sum, mipui ta a ni a, kan sawrkar hrawn mekin party campaign-na atana sawrkar sum a hmang hi thil dik a ni lo,” a ti. An khaw kawng siamsak tiama an party-a lut tura sawmtute chu mipui hmangaihna nei lo an ni tih hrereng turin a chah.
Congress party chuan a thutiam a tihlawhtling lo ngai loa, tih an tiam chu an ti mai zel tih Congress MLA hian a sawi a. An sawrkar a nih chuan mi harsa zawk, dinhmun hnuaihnung zawkte chhanchhuahna turin ‘tang puihna’ cheng nuai hnih, a tul chuan a aia tam pawh an pe dawn tih a sawi. “Tang puihna hi NLUP anga chhungkaw tin hnena sem dur dur tur a ni lo. Nasa taka hna thawk, thahnemngai si, dingchhuak thei lo an awm. Chu’ng mite dinhmun tha zawka an awm theihna tura ruahman a ni,” a ti.
MLA a nih atanga kum 4 chhung an inhrawn tawhah Hachhek bial mipui chu a mizia leh a MLA fund hman dan hrechiangtu an ni, tiin, opposition MLA a nih avanga chhuan tlak hnathawh a harsa chungin, a chunga rinna nghata an la rintawk avangin bial mipui chungah a lawm hle tih Lalrindika Ralte hian a sawi bawk.