Ram chhiatna thiam taka sawi thin hi ram mamawh an ni lo – MNF Thalai V/P

Mizoram chhiatna thiam taka sawi thinte hi ramin a mamawh an ni lo a, an ni ai chuan veng tina YMA branch hruaituten ram tan hna an thawk nasa zawk hle tih MNF Thalai vice president Zodinpuia chuan a sawi.
MNF Thalai Hqrs rorelna sang, extended meeting chu Ningani khan an thu a. Kaihruaitu MNF Thalai vice president Zodinpuia chuan pawl leh ram rawngbawlna kawnga mi rinawm lo ten Mizo mipui hnenah rinawmna neih a tul zia uar takin an tlangaupui mek niin a sawi a. MNF chuan rinawmna an vawng reng tur a ni, tiin, kohhran pawhin mahni awmna kohhrana rinawm lote chu sakhaw rawngbawltu atan an duh loa, politics-ah pawh mi rinawm lote chu ram kaihruai turin mipuiin kan la hnualsuat zel tih a sawi a ni.
Mizo thalaiten hma sawn tuma nasa taka hna kan thawh lai hian, kan dam khawchhuahna tura pawimawh hmasa ber ‘Mizo nationalism’ kan tlansan ang tih a hlauhawm hle tih Zodinpuia hian a sawi a. “Thil dang zawng zawng aiin kan ram leh hnam, kan sakhaw himna hi kan dah pawimawh hmasa ber tur a ni,” a ti.
MNF Thalai hruaitu kalkhawm chuan, ‘Kum 2023 Mizoram inthlanpui lo awm turah MNF-in rorelna a chan leh ngei theih nan theihtawp chhuah nise’, an ti a. Kumin September atangin Mizoram pum huapa Mizo nationalism campaign beihpui kalpui turin an in ruahman. Resolution pathum an pass bawk.