Ram dan leh inkaihhruaina zawm tlan a pawimawh – MZP

Ram dan leh inkaihhruaina
zawm tlan a pawimawh – MZP
Zohnahthlakte zingah hmun danga kan unaute awmnaa kan awm a nih pawhin an ram dan leh inkaihhruaina zawm chu inpumkhatna kawnga thil pawimawh a ni tih Mizo Zirlai Pawl chuan a sawi.
MZP Gen. Hqrs. chuan tunlaia social media lama Zofate inpumkhatna tichhe thei zawnga thawm ri chuan rilru a ti na in, Zofate inpumkhatna duhtu tawh phawt chuan na an tih a rinawm tih a sawi.
‘Zofate hi kan duhthu ni loa thendarhin sawrkar pathum hnuaiah kan ram leh mipui kan awm a. Sawrkar hran hnuaia awm chunga kan inpumkhat theihna’n MZP chuan theihtawp a chhuah thin a, MZP leh nationalist pawl leh mimal tawh phawt chuan hmundang ami hi ramdang mi enin an en thei lo. Hmun hrang hranga Zohnahthlakten chutiang rilru chu pu se tih hi tunhma atangin kan lo aupui thin a, Zofaten inpumkhatna leh insuihkhawmna rilru pu theuh ila tih hi MZP duh dan a ni,’ thuchhuak chuan a ti.
Chutih rualin hmun hrang hranga Zofaten hmundanga kan unaute kalphung leh inkaihhruaina, dan leh hrai inngaihpawimawh sak a ngai tih sawiin, ‘Hmundanga kan unaute zinga kan awm pawhin an duh dan te, an dante ngaipawimawha kan zahthiam a ngai a, chu chu kan inpumkhatna kawnga thil pawimawh a ni,’ a ti.
Tunlaiin khawchhak leh khawthlang lam atanga Mizorama Zofa unau raltlante sawrkar leh mipuiin tha taka kan lo dawngsawng chu lawmawm a tih thu sawiin, raltlante leh hmundang atanga Mizorama lutte pawhin Mizoram state kalphung leh dan leh hrai ngaipawimawh a, Mizoram mipui an zahthiam chu kan inunauna atan a pawimawh tih chu MZP ngaihdan a ni tih a sawi a. Zofate inpumkhatna tichhe thei zawnga che lo tura insum hram hram turin MZP chuan hmun hrang hranga Zohnahthlakte a ngen tih a sawi.