Ram hma hun atana tha kan tih chu official-ten an bawhzui mai tur a ni – Lalchhandama Ralte

Ram hma hun atana tha kan tih chu
official-ten an bawhzui mai tur a ni
– Lalchhandama Ralte
Politician-te chuan ‘dan’ awm lo ‘dan’ a siam kha an hna a ni a, ram hma lam hun atana tha an tih chu sawrkar official-ten a tihhlawhtlin theih dan an bawhzui zawk tur a ni tih leader of opposition Lalchhandama Ralte chuan a sawi.
School Education minister hlui Lalchhandama Ralte hian, school 340 dinhmun chungchangah 180 an provincialise a, hengte hi an hlawh zawng zawng sawrkarin a tum lai, sum sen belh tam lo, sawrkara an luh hian an ‘take home’ a tlem zawk tur a ni, tiin an dah tih a sawi. School thenkhat naupang nei tlem an chhuanlam chungchangah, sawrkarin zirtirtute hlawh a pe tho sia, heng school hi kharsak ngawt theih si loh dinhmuna ding an nih avangin, sawrkar school-a an dah hian thawktute pawh an chhawr tangkai zawk an beisei tih a sawi a ni.
“School 52 provisional adhoc GIA-a hlankai pawh rules a awm lo, an ti. a Politician-te chuan ‘dan’ awm lo dana siam hi kan hna a ni. Chu chu sawrkar official-ten an bawhzui tur a ni. Cabinet-in kan pass kha thla ruk chhunga official-te tihlawhtlin tur a ni. MNF cabinet kha department-te thuin kan kal lo. Kan ram future atana thil tha kan tih chu official-ten an bawhzui zawk tur a ni,” a ti.
DP&AR, Law leh Finance department kaltlang lo an tih pawh, a hmain DP&AR, Finance leh Law official-te thutkhawm puiin an sawipui hmasa vek a. School upgradation an tih dawn lai khan, sawrkar kum leh (next FY) budget-a dah theih a nih leh nih loh en chungin an dah lawk vek a, an arkhawthim dai lo tih a sawi.
“School tam takin signboard thar nen lawm taka hma an lak laiin, sawrkarin a cancel hi a pawi kan ti. Tuna school 52 an upgrade hi a lawmawm rualin, sikul 180 vel dinhmun an hlangkai lo hi a pawi. Zirtirtu full pay pe tho si, sikul an hlangkai duh lo hi thilmak tak a ni. Uniform, text book leh chhun chaw, building grant an dawng dawn lo tihna a ni,” MNF MLA hian a ti.
“Kum 2023 inthlan denchhena thil tia min puhna hi a dik lo hle. School upgradation kha kum 2021 chhoah kan kalpui daih tawh. An ti ve thei lo a nih chuan, ‘Kan ti thei lo’ ti mai se. Keini chuan kan arkhawdim dai ve lo. MNF chuan school upgradation kan tih kha tha kan la ti reng. Kan sawrkar leh a nih chuan a theih ang angin kan kalpui leh dawn,” a ti bawk