Ram hruaitu huaisen kan mamawh – Vanlalhmuaka

Mizoramin thil a nih dan tur ang taka kalpui ngam ram hruaitu huaisen a mamawh hle tih BJP State president Vanlalhmuaka chuan a sawi.
Zirtawpnia BJP Mizoram office-a inkhawmah Vanlalhmuaka chuan kan ramin mahni policy anga kal ngam kan mamawh tih a sawi a. “Ram hruaitu huaisen, mahni manifesto anga huaisen taka kal a, tihlawhtling ngam leh thil a nih dan tur ang taka kalpui ngam, sawrkar hnathawk tha lo te chunga huaisen taka dan anga hma laa hrem ngamtu kan mamawh hle,” a ti.
Ram hmasawnna turin sum kan mamawh a, chutiang chiah chuan kan ram tichhetu pawh sum tho a ni, tiin, miin sum a neih chuan a duh a ti thei mai zel a, kohhran leh pawlah a lai lum an chang leh mai thin tih a sawi. Mizote chu thiam tak tak bik nei loa ti zelzul thin kan ni chu a pawi hle tih a sawi a. Tunah pawh chutiang deuh tho chuan sawrkarin thlur bik neiloin hma a la fo thin a, chumi rah chhuah chu mipuiin kan tuar mek tia sawiin, “Principle fel tak leh tum mumal tak nei ram hruaitu kan neih a, hma kan lak hunah development mipui chhawr theih kan hmu dawn a ni,” a ti.
Mizoramah chuan hnalak chungchangah chhung leh khat induhsak bikna chu kan hmelma lian ber zing ami nia a lan thu BJP Mizoram hruaitu hian a sawi. Hna lak reng rengah duhsak bik awm loa a thiam leh tha berte hna pek kan mamawh a, chutianga chu kan tih theih hunah hma kan sawn lehzual a ring tih a sawi.
Ram changkang kan tih chu education lama an that em vanga ram ropui nih phah an ni thin, tiin, “Keini state-ah chuan sawrkar school hi tha ber tur ni si, Mizorama mi pangngaia kan ngaihten an fate kalna atana an duh loh atang hian education hi sumdawnnaah a chang ni ta in a lang. Private school-ah trained chhuak lem lo zawkten result tha mipuiah an chhawpchhuah sak a, sawrkar school-te tan lak thar a ngai takzet a ni,” a ti.