Ram hum tura an ralthuam chu TAWNGTAINA

Kan ram humhim turin Pathian kan dil’
“Pathian humhimna kan dil nasa, kan ram humhim turin kan ngen a, kan ram humhim hi kan tawngtai thupui ber chu a ni,” Lamka nu pakhat chuan a ti a, an tawngtai nasat thu leh an hlawkpui thu te a sawi.
“Pathianin min hum a, kan la tawlh miah lo. Pathian humhimna a ni,” nu pakhat pawhin a ti.
Zofate ram engemaw zat chu Manipur hnuaiah a awm a, chu hmuna mite chuan harsatna an tawk mek. An ram hi Meitei-in an chuh a, Zo hnahthlakte’n mahni ram hum an tum thung. Chuta an hmanraw pawimawh chu tawngtaina a ni.
Upa Lalramliana, Khawpuibung Presbyterian Kohhran hruaitu chuan inkhawm thei lo mah se Zo hnahthlak biak in hrang hrang an hawn thu leh, mahni remchan hunah kohhran mipui an tawngtai thin thu a sawi.
“Biak in hi kan hawng deuh vek ang. A duh apiangte an tawngtai theih nan kan hawng a, kan tawngtai sup sup a. Pathian humhimna pawh kan chang, Pathianin min veng,” a ti.
An khingpuite’n lirthei leh ralthuam tha tak tak an neih thu a sawi a, sniper an awm thu te, bullet proof an neih thu tel silai tha an neih thu te, lirthei pawh an ngah thu te sawiin, chung chu mi tlawmngaite’n hmanraw tha pawh nei lo chungin an hmachhawn tih a sawi a, “Pathianin min veng a ni,” a ti.
Lamka Chhim veng nu pakhat Pi Laltanpuii chuan, “Pathian humhimna kan dil. Kan ram kan humhim nan tih hi kan thupui chu a ni,” a ti a, “Kan Pathian hi Pathian nung a ni a, Pathian tak a ni tih hi ring lote’n an hriat theih nan kan dil. Pathian thiltih mak pawh hmun hrang hrangah a thleng,” tiin, “Duty-te tan kan dil a, ram kan hum theih nana hmalatute tan kan dil,” a ti bawk.
Manipur-a Zo hnahthlakte hi an inkhawm thei lo a, chuti chung chuan biak in an hawng. Biak inah chuan zing atangin an tawngtai a, zan lam hi curfew ni mah se duty an awm lo; biak in hnaih deuhva mite chu zan lamah pawh biak inah kalin an tawngtai thin.
Biak in hrang hrangah a hmaa an tih thin danin zing tawngtai inkhawm an la nei thei a, chawngheia tawngtai an awm thin bawk. Chawlhni-ah tawngtai inkhawm an nei thin a, chawhma lam dar 10.30 atanga chhun dar 1 thleng tawngtai inkhawm hi an nei tlangpui.
Hriat theih chinah Vaiphei, Paite, Thado, Kuki te chuan tawngtai tlaivar an buatsaih thin a, darkar khat te tea hun insemin kohhran mipuite a inchhawkin tlaivarin an tawngtai thin.
“Tih tak zetin kan tawngtai a, lung a chhe duh khawp mai. ‘Ka hlawkpui lutuk, hetiangin ka la tawngtai ngai lo,’ ti te kan ni nawk mai,” Pi Laltanpuii chuan a ti.
“Pathian chhanna kan hmu a, kan la tawlh miah lo. A tir lamah khaw te tak te te kha an hal a, chung chu an chhuahsan a, chutiang tih loh chu kan tawlh lo. Kan inring hman miah lo a, he thil hi thil thleng thut a ni a. Chutah hmanrua kan nei bawk si lo. Chuti chung chuan kan tawlh lo a, Pathian humhimna a ni,” a ti bawk.
Manipur-a Zo hnahthlakte hian mahni zawn theuhvah mahni khua leh a ram humhim an tum a, chhun zan zawmin mi tlawmngaite an ‘duty’ thin. A lehlam hi Meitei pawl lian leh chak Arambai Tenggol hmingin an che a, mahse Manipur Police leh commando an tel ngeiah ngaih a ni. Zo hnahthlakte chuan an khingpuite’n ralthuam an neih that thu leh hmanraw lamah pawh an changtlung tih te an sawi a, an silaimu pawh a tha chi a ni tih an sawi.
Nu pakhat chuan ram humhim tuma beitu an mite’n hmanraw tha an neih loh thu a sawi a, “Tukuli nen te an duty a,” a ti. “Kan duty-te hi an huaisen em em mai a ni,” a ti bawk.
Inkah dawnah te, inkah lai tein mipui an lo tawngtai a, ‘A rawn kal mek a, kan inkap dawn e, lo tawngtai rawh u,’ tiin duty-te’n thu an chah a, internet an hmang thei lo chungin a theih ang anga inhrilh darhin mipui an tawngtai sup sup thin. Chu chu an ralthuam pawimawh a ni.