Ram laiah development liantham dah zel a remchang – Dr R Lalthangliana

Mizoram chhak leh chhim, hmar tawp leh khawthlang lama development liantham dah ai chuan, ram lai lamah development liantham dah zel a remchang zawk tih minister Dr R Lalthangliana chuan a sawi.
Govt Serchhip College Women’s Hostel chu Thawhlehni khan Serchhipah Higher & Technical Education minister Dr R Lalthangliana hian zirlaite tana luah theih turin a hawng a. Serchhip chu Mizoram laili taka awm, development hrang hrangin a la pawh tur khawpui, chhim lam leh khawchhak lam atangin Serchhip lut loa kalna remchang hmun dang vang tak a ni, tiin, “Hmar tawp emaw thlang tawp emawah development liantham dah ai chuan, helaia dah zel hi a remchang a, chu’ngte tihlawhtling tur chuan kumin kumtawp lamah ngaihtuahna fim tak hmanga mipuiin rilru in sen a pawimawh dawn a ni,” a ti.
Sawrkar building tawngpawng sak teuh teuh chu a tul ber loa, a luahtu leh thawktu turten an luah nghal a, post nen awmchilh nghal a pawimawh tih sawii, “Congress sawrkar kha ka sawiselna niloin, a luahtu tur post ngaihtuah hmasa loa, he bial thenawm Tuikum bialah pawh polytechnic building sum tam tak senga pamtul mai maite hi sawrkar tan insen thlawnna a ni a, Mizoram hmundangah pawh building ropui tak tak cheng tam tak senga sak, luah chhunzawm leh si loh tam tak awmte hi a uiawm takzet a ni,” a ti.
Aizawl pawna college zinga NAAC ‘A grade’ hmu thei hmasa ber Serchhip College chu Aizawl pawna college dangte a tiphurin chona a pe nasa em em tih H&TE minister hian a sawi a. Quality education tak tak paw chhuak tura fuihin, “Mizoram sawrkar hnuaiah ringawt hna a awm lo, thiamna tak tak neite chu hna hian a zawng zawk a ni,” a ti.
Women’s Hostel hi University Grants Commission atanga cheng nuai 40 an dawn hmanga bul tan niin, sum awm chhunzawm loh avang hun engemawchen chhunzawm theih loh hnu ah, minister Dr R. Lalthangliana hmalakna in State Fund atangin nuai 17 an dawng leh a, chumi hmang chuan luah theihin an peih a, naupang 24 leh warden awm theihna tur a ni.