Ram leh hnam chhanna atan dawih aw kan chhuah dawn lo – Chief minister

Ram leh hnam chhan nan tu lakah mah ‘dawih aw’ an chhuah dawn lo tih chief minister Zoramthanga chuan a sawi.
Mizo Students’ Union-in Thenzawla general conference vawi 21-na an neih a hmanpuinaah chief minister chuan kan chhehvela harsatna thleng avanga lokal kan unaute tana zirlai pawlte hnathawh hmutu a ni a, an thiltih chu a chhuanawm tih a sawi. Buaina tawk kan unauten thlamuang taka an nitin nun an hman theihna tura Mizoram an pan leh an beisei ang ngeia ralmuanga an awm chu a hlu hle tih sawiin, “Chutiang tih sak thei ram neitu kan ni hi a hlut zia ngaihtuah thin ila, buaina namenlo paltlang hnua ram ralmuang ni ta Mizoram huhang hi a na em em a. Kan neih ang remna leh muanna neih ve theih beiseiin thenawm state leh ramten Zoram lam an rawn hawi thin a, Aizawl an be pawp thin. Mizoram huhang zar pawh kan zo tlang chho zel a, kan la zo chho zel dawn a ni,” a ti.
Tunhnaia Zofate thlavang hauh nana Mizoram hmalakna sawiin, “He ram leh hnam chhan nan hian tu lakah mah ‘dawih aw’ kan chhuah thiang loa, kan chhuah ngai hek loang,” a ti.
The Ladies Organisation chuan Myanmar atanga raltlante hmangaih leh duat taka Mizoramin a lo tuamhlawm avanga an lawmzia tarlanna ‘lehkhapui’ (citation) chu chief minister hnenah leh Central YMA hnenah an hlan a ni.
Hun hmanpuitu dang minister Robert Romawia Royte pawhin Mizoram leh India sawrkar inremna thuthlung kha a hlu em em a, hmasawnna kan hmuh chhoh zel bakah Article 371G hnuaiah kan ram leh hnam hi ven tlat a ni, tiin, “Hei hian kan hruaitu hmasate fin zia leh ram an hmangaihna thuk zia a tifiah hle. Khatiang thinlung kha puin thalai rualten ram leh hnam hmangaihna rilru pu zel ang u,” a ti.
MSU conference hi September 5 atanga neih tan a ni a. Vawiin thleng a awh ang. Ningani hian Central YMA president R Lalngheta, MSU Gen. Hqrs president Samuel Zoramthanpuia bakah sawm bik midangten thu an sawi a ni.