Ram leh hnam hmangaih….

Inthlanpui a hnai zel a, political party hrang hrangin sawrkarna siam tumin election campaign an bei ngawrh chho tan leh ta hle a. Tunhmaa election campaign boruak leh tun hnua election campaign boruak chu a danglam ta hle a, hei hi a chhan ber chu, mipui kan lo fin var ve tak zel vang niin a lang.
Tunhma deuh kha chuan mipui tam zawkin ram inrelbawlna thil kan ngaihsak lo va, ram dinhmun tur kan thlir thui lova, kan ngaihtuah pha meuh lova, election lai vela hamthatna engemaw thlerho tlem te te kha kan lungawipui mai thin. Mipui phak tawk a la hniam ang bawkin politician-te election campaign hmanrua pawh kha a hniam ve zel mai niawm tak a ni. Vote inlei a hluar chhan pawh, ngaihtuah chiang mang lova vote hralh mai mai duh kan la tam vangah puh a nuam hle bawk awm e.
Tunah chuan election campaign laia therhlo beiseia phar kual vel mai mai kha kan ram dinhmunin a tawrh phah thei tih experience kan nei tha ta bawk a ni ang, political party-in ram kaihhruai a tum dan a tha nge tha lo tih chu election dawna mipuiin kan ngaihven zawnga nih ve tak avangin, political party-te pawhin mipui sukthlek mil turin an inher rem ve zel a, election dawnah policy an inzawrhsiak ve ta. Hei hi ram leh hnam hmangaihna kailawn pakhat a ni kan ti thei awm e.
Ram leh hnam hmangaih hi ram hruaitute tihtur bika ngaihna hi mipui lamah a lian hle thin a, a dik em em rualin, mipui lam pawh hian ram leh hnam hmangaihna rilru kan put loh chuan hruaitute hian ram leh hnam hi an hmangaih reng thei bik dawn lo tih kan hriat a pawimawh. Hruaitu tha chuan ram a hruai tha thin teh meuh mai, mahse mipui tha pawhin ram hruaitu tha lote hi an hruai tha ve thei tih kan hriat a pawimawh. Hruaitu dik nei tur chuan mipui pawh kan dik a ngai ve si a.