Ram leh hnam hmangaihna thinlung nen SIR kalpui duh

Vote nei thei lo turten an tuchhuan thlenga vote an neih theihna tur a nih tawh dawn avangin Special Intensive Revision neih mek chu ram leh hnam hmangaihna thinlung pu a, fimkhur taka kalpui turin joint chief electoral officer Ethel Rothangpuii chuan a thawktu turte a chah.
Chief electoral officer office Mizoram buatsaihin Mizoram puma electoral registration officer (ERO) leh assistant electoral registration officer (AERO) te pualin Thawhtanni khan Special Intensive Revision (SIR) 2026-a hming paih, inthunthar leh siamthat hun (claims and objection period) a an mawhphurhna zirho a ni.
Kaihruaitu joint CEO Ethel Rothangpuii chuan, SIR chu ram leh hnam khawih thil a nih angin theihtawp chhuah a ngai tih a sawi a. Enumeration phase a zo a, draft electoral roll tarchhuah a ni tawh a; tunah chuan claims and objection period-ah kan awm mek, tiin, ERO leh AERO tih tur a pawimawh hle dawn tih a sawi.
SIR 2026 final electoral roll tarchhuah a nih hunah vote nei thei zawng zawng electoral roll-a an chuan theihna tur leh, vote nei thei lote roll-ah an hming a lan ve lohna tura theihtawp chhuah a tul tih sawiin, “Final electoral roll-ah hian hming lang lo tur an lo lang a nih chuan, anmahni bakah an tuchhuante thlengin India khua leh tui, vote nei thei nihna an neih tawh dawn avangin, ERO leh AERO ten ram leh hnam hmangaihna thinlung pu in, fimkhur takin hna an thawk tur a ni,” a ti.
Chawhma lamah Champhai, Lunglei, Lawngtlai, Serchhip, Mamit leh Saitual district-a ERO leh AERO ten hun an hmang a. Chawhnu ah Aizawl, Kolasib, Hnahthial, Siaha leh Khawzawl district ERO leh AERO te an training. State level master trainer Lalnunfela Chawngthu leh Timothy T Lalhmangaiha ten an zirtir a. Zawhna awmte chhan niin, sawiho a ni bawk.