Ram leh hnam tan YMA

Kan rama Chanchintha rawn thlentu Sap missionary-te khan kan hnam dinhmun hi an lo zirchiangin an lo hmu chiang hle a. Hnam hnufual tak, zirtir ngai tak kan nihna kha hriain, Wales rama association pakhat Young Wales Association ang deuha pawl din an rawt a, Young Lushai Association an lo din ta a. He pawl hminga ‘Young’ tih hian thalai/tleirawl lam kawk lovin, khawvel hmasawnna eng la hmu pha lo, hnam thanglai, chutiang kawnga hnam la naupang tak kan nihna changchawia ‘Young’ hi hman a nih thu anmahni pawh khan an lo sawi thin a ni awm e.
YMA Day vawi 88-na kan lo hmang leh ta der mai a; YMA (YLA) lo dintute khan tuna YMA dinhmun hi rawn hmu leh se, ropui an ti ve hle ang tih a rin theih.
YMA hi lo awm lo ta se, YMA-in ram leh hnam tana a lo thawh tawh zawng zawng kha, ‘thawh loh’ emaw, ‘tih loh’ emaw ni turin han suangtuah chhin ila, suangtuah ngam pawh a ni awm lo ve. Tunah phei chuan, sawrkar a awm chung pawh hian, ram leh hnam hnuk khawih thilah, YMA tel lo chuan sawrkar pawh hi a che chhuak hleithei tawh lo achha chu a ni. YMA hi lo awm lo ta se, sawrkar inrelbawlna leh sakhaw inrelbawlna kawngah pawh, tun dinhmun hi kan phak lo hlein a rinawm.
Hnam nun vawnhim kawnga YMA thawhhlawknate hi a hlu hle mai. Hnam culture leh tradition vawn nun kawngah, YMA hi lo awm lo ta se, kan pachhe hle dawn tihna a ni bawk awm e.
YMA tangkaina, pawimawhna leh hlutna hi sawi sen a ni lo. A khaikhawm nan chuan ‘hnam sawrkar’ tiin a sawi thei ang a. Ram sawrkar hi chuan ramri a nei a, mahse hnam sawrkar hi chuan ramri a nei ve lo. Tuna Zofate insuihkhawm lehna tura hmalak meknaah pawh hian, YMA tel lo chuan hma lak tak tak theih a ni lo.
Heti khawpa pawimawh leh hlu YMA hi a kalphung thain hlu hle mah se, hman sual ve theih a nih avangin, a kal sual tur veng ila, ram leh hnam tana dai ngul rinawm ni zel turin member tinte kan pawimawh vek a ni.