Thalaite thlavang hauh ang aw!

BY Rosangzela, Vh, 8974138026
Sumdawnna khawvelah kan lut thuk zel a, hriat ngai loh kawng thar kan thalai ten an luhchilh chho zel a. Kum 2008 vel khan Insurance Company lamah kan thalaite agent hnathawkin Aizawl khawpuiah tul takin heng ICICI Lombard, Reliance Insurance, Bajaj Insurance, SBI Life adt. ah te an inhlawh chho a, General Insurance lamah pawh inhlawhna a awm zel a. Mizo rilruah hian insurance policy lei hi a nachang kan hre lo nge kan rilrem vak lo, inhrilhfiah fe pawhin chiahpuam ang mai a hlawk thur thurna ni tura ngaihna a lian hle. Chiahpuam vanglai khan heng insurance policy ke hrang hrangte hi zawrh kual a nuam phian niin an sawi thin. Ram pawn lama inhlawh lam a rik phat atangin kan thalaite an che nghal a, Aizawlah pawh helam buaipui a training centre hawng rum rum te pawh an awm kha. Singapore lama thawh kha a lar viau a, a hlawk lutuk tih mawlh mai kha a ri ring. An han sawi tak tak chuan, chumi khami veng ami chu Singapore-ah hna a thawk a, a chhungte pawisa a thawn teuh teuh tih te a ni. Hna zawnsak thei ‘Placement Solution’ lam pawh Aizawlah hmuh tur a awm nghal vat a, training te pein kan thalai engngemaw zat chu South East Asia lamah kan inthawnchhuak suau suau a nih kha. Kan thalaite hi an duai lo a nia.
A ki thlakin Cruise- lawng lam leh hotel, Spa, resort adt. a hnathawh an langsar leh a, heng foreign leh India lairil lama hnathawh hi kan umzui ta viau a. Mizo thalai ram pawna eizawng an thahnem tawh khawp mai, thil lawmawm lam a ni. Kan tthalaite hi khawvel ram hrang hrangah hian eizawngin an inzar pharh ve hle tawh a ni. Non Resident Indian ten India Economy tan an thawh hlawk a, keini ramah pawh kan thalaite hian sum chevel an rawn siam ve tho. An chhungte pawisa rawn thawnin in hmun lo ram lei thei ta te pawh an awm nawk mai, nula pahnih pawhin an khuaah concrete in an sa ut mai. |halai hawi mai mai nia kan hriatte hi hmuh loh chhungin Dubai lamah te an lo inhlawh daih a sin, Mizo thalaite hi an chhel a, an huaisen bawk, a thawk aphita thalaite sel a tuar chhel lo leh zawmthaw lutuk ang maia kan sawi fo hi a dik lo.
A la rei lo, Blue Dart Courier ah Online a thil kan chah kan lam thin a, hun a lo kal a Service Sector-ah hmel thar kan hmu zel a, online marketing lam kan thalai ten an han luhchilh leh a. Tunah chuan kan thalai tamtak two wheeler-ah ipte lianpui pui akin bungraw chah an sem kual sung sung a nih hi, thawhtur a awm chuan kan thalaite hi an nep lo. Online Marketing kan hmelhriatna a la rei lo tehlul nen tunah chuan Mizo nula tlangval ten anmahni bungrua/thawmhnaw adt. te chu online-in marketing an kalpui chur chur tawh a ni. Veng tinah thalai kawng kuala thu mai mai hmuh tur an awm mang ta lo, tunhmaa TMB nam liam tham thu mai mai tih kha chu sawitur a awm tawh lo. Sawrkar hna tha ‘white colour job’ chauh ngaihven lo thalai tum ruh tak tak, mahni kutkawih ngeia hmasawn tum ‘Entrepreneur’ an pung zel hi ngaihven tham a ni. Tun hnaiah Mizoram sawrkar hnuaiah Entrepreneurs lam chawikanna Department kan nei ta a, thalai tamtak thiam bik thil nei turin Skill development programme hrang hrang an kalpui mek a. Entrepreneur Skill Development Programme (ESDP) hi tunhma deuh kha chuan IIE (Guwahati), leh EDI (Ahmedabad) te khan hma an rawn la nasa a. |halai tamtak an training chhuak a ni, Electrical House Wiring, Food Processing leh Photography te phei chu a hlawhtlingin tun dinhmunah mahni kutkawih hmanga eizawng mi engngemaw zat an awm mek a ni. Kan thalaite hian Job Oreinted lam hawia training awm tawh phawt chu an bawh huai huai a ni, an awm mai mai tawh lo.
Union Public Service Commssion leh Central Service hrang hrangah kan Mizo thalaite an lut hlei thei lo tiin Sawrkar angin Youth Commission hnuaiah an lak dan tharin hma an han la a, Kohhran lamah pawh Mizoram Synod chuan Central Service bakah All India Service-ah thalai an tlin chhoh theihnan Synod Resources Centre , Zirlai Viltu Committee a din a; hmalakna chi hrang hrang neiin TV lamah sawihona buatsaih leh exam bei turte tan a lehkhabu tangkai buatsaih te a ni. India rampum huapa Sawrkar hna lian leh laihawl a thawk turin kan thalaite an tling hlei thei lo tiin kan rualawh thu hi sawi sawi mah ila, kan ram chhung inrelbawl danin thalaite rirlru a tih piansual chhung chuan eng kan ang lovang. Mizoram chu sawrkar hnathawk tan vanram a ni ngawt a, a hria ten an sawi danin kan State Civil Service chu IAS nih ai pawha ‘Prestige’ sang zawk ang maiin kan cheibawl a, hetiang taka kan sawrkar hnathawkte nuam singkhawa kan siam avangin State pawn chhuah duh lohna leh tul tih lohna a lian a, hei hian a saptawng takin home sick a siam a ni an ti. Rilru piansualna tiphuisui turin Politics lam atangin beisei tur chi hrang hrang kan hlui a, Police ah i tang dawn a nia tih te chumi khami Dept. ah MR / PE-in i lut thei ang tih te a ri reng a. Lehkhathiam thei tak, han bei deuh sela Central lam Service engemaw ah te chuan a inziak tling thei ang mawle kan tih te chu Police Constable hna kan hmuh sak a, MA val kha tairaw tiang nen an duty ta ruk ruk a nih hi. Kan thalai hawiher zau leh degree tha tak tak nei ten an degree nen a inhmeh lo khawp hna mawlmang zawk an thawk hi chu rilru a na deuh. Party tana sawrkarna siam ang chauh a khawsa kan sawrkar hian thalai duhawm taktak teah rilru hniam ‘inferiorty complex’ a neihtir ta a ni.
Kan Politics kalpui dan chhemi hian kan thalaite khawvelah thinlung dawrawm a siam a, party rawngkaia zirtirtu lak huk te, Police lak huk te, CSS hnuaia inthun te an kalpui a. Beiseina siam sakin beidawnna an pe leh a, Bhavan List tih leh Hnam Run List tih vel avangin thalai thluak hriam tak tak te chu a bil zo va; exam hram hram ai chuan, party-a thunei chin bel bul a fuh zawk tih rilru kawisawi tak an put phah a ni. Mahse, Pathianin kan ram hi min hruai a, thalaite an harh thar zel a, tunah chuan thutak an zawng tawh a ni. Politician-te avanga rilru hnual leh kawisawite pawh thinlung thar nen hma lam an thlir ta. |halaite hian Ram hruaitute chu ‘joker’ ang chauhah an ngai hial tawh a; chuvangin, mahnia dinchhuah duhna thinlung put hi ‘Neo Fashion’ a ni mek. Khawtlang leh Kohhrana thalai chetvelna tam lutuk te pawh a ziaawm chho mek niin a lang, kan thalaite hi an thluak a hriamin engtikniah emaw chuan ram hi movement ropui tak hmangin an la khaichhuak ngei ang.