Ram pass lem siam hmanga compensation dawngtu hrem

India leh Bangladesh inrina hung a nih laia Chakma Autonomous District Council hnuai atanga ram pass (LSC) lem siamchawp hmanga zangnadawmna dawngtu, court-in thiam loh a chantir mi 23-te chu lung tang tur leh sumfai chawi tura hrem an ni.
Prevention of Corruption Act Court special judge Dr HTC Lalrinchhana chuan heng thiam loh a chantir takte hremna hi Thawhtanni khan a tichhuak a. Hetihhun lai (2007 vel) Chakma ADC-a revenue officer (Settlement) Ranga Mohan Chakma chu a meizang hlaptu ber leh ram pass dik lo zawng zawng pe chhuaktu a nih avangin hremna pek nat ber a ni a, kum li (4) chhung lung in tang tur leh sumfai cheng nuai thum chawi tura tih a ni. Sum chawi tur hi a pe theilo a nih chuan thla 9 chhung lung in tan in a tlak thei ang.
Midang 22 hi chu kum khat theuh lung in an tang anga, sumfai cheng nuai thum theuh an chawi ang. An sum chawi tur hi an pe thei lo a nih chuan thla 9 chhung lung in tan in an tlak thei ang.
Hemi thubuai kaihhnawiha lung in an lo tan tawh chu an tan hun chhungah hian chhiar tel tur a ni thung.
Mi 23 thiam loh chantir zinga police-ten an la man theih rih loh chu bail theih loh manna thupek, hun tiam bik awm loa man an nih hma atana kenkawh tur (standing non-bailable warrant of arrest) pechhuak turin court hian thupek a siam bawk a. A chhuitu CBI hnenah hemite pahnih chunga dikna hlenchhuak tur hian a tul angin court-ah dilna (criminal miscellaneous application) thehlut leh thei turin court hian zalenna a pe a ni.
PC Act Court chuan, heng mite hremna a pek dawna a ngaihtuah thenkhat sawifiahin, ‘Mipui sum kalral hi Rs. 69,83,500 a ni a, a hunlai milin a tam tham hle. Sawrkarin mimal ram a laknaah hian hlemhletna leh felhlel a hluar hle a, tun hun leh nakin hun atan awmze neia hremna hi lekkawh a ngai,’ a ti.
Ram leilung enkawlnaa thuneitu Revenue official-ten an thuneihna an hmangsual thin chu thil pawi nasa tak a ni, tiin, he thubuaiah phei chuan CADC-a Executive Committee-in ram pass lem hi dikna hailanna ti sukuk tura lo tichhe vekin, a aiah ram pass dang an lo siam leh chu dan bawhchhiatna tenawm leh tawp tak a ni tiin a sawi bawk.
‘He thubuaiah hian tute nge thiam loh chantir an nih, tih aiin, an dan bawhchhiat rip tak hi hremna pek zawk tur a ni a, diknaa rorelna chhinchhiahna tarlan thin angin, duhsak zawng leh zawng loh hrechang lo turin court-a roreltute mit chu tuamphui a ni zawk,’ a ti.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More