Ram pawna thawk tur intirh danah police-te puihna ngen

India ram pawna Mizo hnathawka awm, manganna tawk mekte hruai haw an nih theihna’n Mizoram State thupuangtu Lalremsangi Fanai kaihhruaiin harsatna tawk chhungte chuan Ningani khan SP Aizawl-ah leh SP CID (Crime) ah FIR an thehlut.
BJP Mizoram State thuchhuah danin, India ram pawna hna thawk tur Mizo thalaite tirh chhuah chungchangah an kalna tur ramdang dan hriat tawk loh avanga bawhchhiatna, ramdang nunphung ziarang danglam bik avangte in Mizo zingah harsatna hrang hrang tawk an tam a, hengte hian BJP Mizoram hotute hnenah puih dan kawng dap pui turin an ngen a. BJP State thupuangtu kaihhruaina hian he Mission hi kalpuiin, Union Home ministry, embassy, consulate, External Affairs ministry leh Mizoram sawrkar official-te biak an ni tawh a, a tul hmasa atan Mizoram State Police hnenah First Information Report (FIR) thehluh a, private employment agency/ placement agency zawng zawng chhuichhuak a, tute nge dan bawhchhia tih hriat hmasak a tul tih a sawi.
‘Mizo thalai ram pawna hna thawkte leh hnathawka kal tumten harsatna an tawh fo lohna’n Private Placement Policy kawng dik chu ngaihpawimawhah nei a, hetianga harsatna tawk mi engemawzat tanpuiin India ram leh ram pawn atangin BJP Mizoram chuan a lo hruai haw tawh thin a. Tuna harsatna tawk leh an chhungte pawh lungngai lo turin kan chah a ni,’ thuchhuah chuan a ti.