Dr. Lalsiamhnuna
8131822506
-- Advertisement --
A thu chuan zirna tha kan ngai pawimawh hlawm khawp mai. Kan ram hruaitute hlei hleiin an ngai pawi mawh. Sawrkar thar (ZPM) a lo ding a. A changtu Minister chet dan atangin kan lo lawm hman viau tawh a, zirtirtu tha tak tak te khawpui atangin an han chhuak sang sang a, kohhran leh khawtlangah an tangkai bawk si; thingtlang leh khawpuiah zirna rualkhai takin a kal tan tawh dawn e, a va lawmawm tak em! ZPM Sawrkar nge nge’ mi tam tak chuan an lo ti hman tawh hial. ‘Mahse, Lalpa a rei lo em!’ tih ang mai. Kil hrang hrang atanga nawrna ni maw, khawpui lamah bawk an lut leh ta sup sup mai. Principal leh Zirtirtu (Professor/ Associate Professor/Assistant Professor/Lecturer) post ruak te pawh an fill up thei tawh ang chu maw kan lo tih rilrukte kha mumang ang maiin a thamral leh ta. Pawi tak a ni.
Zirtirtu sem rual kan ti thei lo emaw, Principal post ruak, (a bikin, thingtlangah kum li kum nga lai lo ruak tawh te) kan hnawh khat thei lo emaw a nih ngat chuan ‘Zirna siam that ka vei e’ kan tih ai chuan tuaiin ‘thi ka nei’ ti se a awihawm zawk hial ta ve ang. Tun hnaiah Mizoram chhim tawp leh hmar tawp thlengin ka zin kual a, Higher Secondary School leh College lam pawh ka tlawh nual a, an khawngaih thlak hlawm tak zet. Principal nghet neiha ram an awm lo. Zirtirtu senior an pensiona, pension lo, che thei deuh ten khawpuia in-transfer an dil a, an hlawhtling zel bawk si, zirtirtu nghet lo rualin naupang an enkawl. Zirna kan ti sawngkawn a, kan sawp chhe zo tak ngial dawn. Khawpui lam chu ziaawm tak an ni; Principal nghet nei lo College thenkhat te phei chuan a nghet nei an chak vak lo.
Ram pum huap zirna siam that kan duh tak zet chuan, tlak phah thak ngama kan chet a ngai tawh. Zirtirtu sem rual (Transfer & posting) hi kan ti thei ngei ngei tur a ni. Khawpui atanga hmun hla leh hrehawm a sawn chhuah ten hrem tuara an inngaih loh nan, a hla leh hrehawm apiangah special allowance pek tam mai tur. Chuti chung pawha la luhlul tlatte chu voluntary/compulsory pension pek mai ni se.
Kan ram khawpui ber a ni bawk a, Aizawl hi nuam kan ti mah mah. Sawrkar hnathawkte pawhin kum hnih khat lek chhuahsan pawh thih hreh takin kan hreh hlawm. A ni em em lo. Kan rilru sukthlek (mentality) kan thlak a ngai. Kohhrana rawngbawltu/ Upa te kan ni lawm ni. Missionary-ah inngai ila. Kan politician-te thiam loh tak pawh a ni pakhat e. Thil tha zawng zawng khawpuiah kan dah vek zel a. Kan hotute pawh kan khawhawi kan tihzau-hlat a pawimawh ta. ‘State University’ Aizawla dah ngei ngei tur ang rilru kan put chhung chuan ram pum hmasawnna a rualkhai tak tak thei lo vang tih i ring ang u. Traffic jam erawh kan tipung zel ang. State capital-a awm ngei ngei tur bak thil pawimawh dang te hi chu hmun dang, dah-na awmah chuan, dah hreh lo ila.
Tun hnaia Adhoc-Aided High School thenkhat Sawrkara dah tum chung changah, ‘Zirlai 60 chin’ tih ang chi leh ‘a thawk mek’- hrehawm tinreng lo tuar tawhte chhawk tumna ang lek lek chi te phei hi chu, thil ‘serious’ lutuk, tih rum rum chi loh a ni tih hriat a tha. Mi dik, huaisen kan ramin a mamawh hle.
A khaikhawm nan: Ram tana tha turah chuan, a bikin zirna siam that kawnga tan lakna-ah, kan ram roreltute hian, tlak phah thak dawn pawh ni se, dodalna nasa tak karah pawh, huaisen takin kalpui hmiah hmiah rawh se. Ram an hmangaih tak zet chuan an la lawm zawk tho vang. Tlak pawh an tla lo bawk ang. NGO/Zirlai Pawl, etc. te pawhin chu tiang kawngah chuan sawrkar thlawpin an kut tihchak tum bawk ila, kan thlawp theih ngang lo a nih pawhin, dodal lo tal ila, hma kan sawn ngei ngei ang.