Ram ralmuanna hian police-te discipline a tihniam tur a ni lo: – Home minister

Ralmuanna chu ngaia neih awl tak, inthlahdahna siam thuai thei a nih avangin muanna chuan police-te discipline a tihniam tur a ni lo tih Home minister K Sapdanga chuan a sawi.Mizoram Police chuan kum 2026- 2027 hi “Year of Discipline” atan a puang a. Nilaini khan Police Headquarters Aizawl-ah khuhhawn niin, hmanpuitu Home minister chuan, police tan discipline chu duhthlanna a ni loa, an innghahna lungphum, chu lungphum chelh dingtu chu rinna a ni tih a sawi.
Democracy laimu chu mipui leh sawrkar inkara inrinngamna a ni, tiin, mipuiin an zalenna tam tak dahkhamin sawrkarah rinna an nghat a, chu rinna behchhan chuan sawrkarin mipui tan rawng a bawl thin tih a sawi. Mipui rinna chu amaha lo awm a ni loa, nitin hlawhchhuah ngai a ni tih a sawi a ni.
“Mizoram hi state ralmuang kan ni a, ralmuanna hi ngaia neih awl tak a ni a, chu chuan inthlahdahna a siam thuai thei. Kan inchhuanna, state ralmuang kan nihna hi kan police standard tihniamtu ni loin, inbuatsaihna hun tha min petu ni zawk rawh se. Police tan chuan inthlahdah hi kan hmelma lian ber a ni,” a ti. Police tha tehna chu hmun ralmuanga an chet dan a ni ngawt loa, harsatna a lo thlen thulha a inralrin danah a innghat tel, tiin, police tha chu hun ralmuangah inthununna tha nen a inbuatsaih reng a tul tih a sawi.
Discipline chu an chezia, an thusawi, thutlukna an siamah a lang tur a ni a, chu chu an rawngbawl sak mipui hmuh theihin a langchhuak tur a ni tih Home minister hian sawiin, outpost kilkhawr ber atanga Aizawl khawpui lun lai ber thlengin police-te inthununna leh invawnna a lang tur a ni tih a sawi a ni.
Mipui chunga thuneitu an ni lo a, an uniform chu thuneihna kengtu a ni ngawt lo, tiin, mawhphurhna leh zahawmna kengtu, mipui ralmuang taka an awm theihna tura an rawngbawl saktu an ni tih theihnghilh lo turin a chah.
“Year of Discipline hi thu maia kan inhampuarna ni lo se, kum khat atana kan thil tum ni mai loin, Mizoram Police thil tum pawimawh ni reng se tih hi ka duhthusam a ni. Tih tak takna nena beih chuan, tihphung tha min siamsaktu a ni ang tih ka ring a. Mipuiin police chunga rinna an nghah ngam lehzualna tur rahbi pawimawh tak a ni ang,” a ti.
DGP Sharad Agarwal pawhin, ‘Year of Discipline’ hmalakna chu police force lungphum tichak thar tura tan lak tharna a ni tih a sawi a. Inthununna tha chu police force innghahna a ni, tiin, thutlukna siam kawngah leh rualkhai taka thiltihna, mipuiin police an rinna tura pawimawh ber pakhat a ni tih a sawi.
He hmalakna atana inkaihhruaina leh hmachhawp awmna lehkhabu, “Mizoram Police Model Guidelines for Year of Discipline 2026–2027 (Core Principles and Specific Areas of Focus)” chu Home minister hian a tlangzarh nghal a ni.
‘Year of Discipline’ lungphum leh thlur bik tur chu:
q Hun vawndik, mahni hnaa rinawm leh thahnemngai taka mawhphurhna hlen chhuah, hnathawh dan kalphung inkaihhruaina vawndik, document vawndik, dan zawmthat leh thubuai chhui (investigation) a hun taka tihfel.
q Hna chungchangah nungchang mawi vawn, mipui nena indawrnaah inthliarhranna awm loa rualkhai taka chet, mi harsa leh chak lo zawkte hriatthiamna neih.
q ‘Train to Excel’ programme hnuaiah taksa hriselna leh engtik lai pawha che chhuak thei tura inbuatsaih, turnout fel tak nena parade, drill leh endikna (inspection) neih thin, police hmunhma hrang hrang (establishment) fai taka vawn leh enkawl, sawrkar bungrua uluk taka enkawl leh chumi chungchanga mawhphurhna lak, rinawmna, dik leh langtlang taka hnathawh leh hotuten an hnuai amite hnathawh vil that.