Tum khata chhul khat a\anga nau piang tam ber ten school an kal ve dawn ta

Nonuplets an ti mai a, keini chuan phir pakua kan tih a ngai! Nu pakhatin a tum khat fa neiha a hrin vek an ni a, tum khat fa neih a nau hrin dam hnem ber record an siam. Tunah chuan kum 5 an tling ve ta a, school an lut ve dawn ta a ni. An unau hi mipa pali leh hmeichhe panga an ni a, Mali a cheng Halima Cisse leh Abdelkader Arby te fa an ni a, an nupa hian heng phir kua te bakah fanu Arby, kum 7, an nei bawk.
Naupangte hringtunu Halima chuan, “Naupang te an tha a. An hriselna a tha a, an harh tha hlawm viau a, hlimna min thlentute an ni e. An than a thain an duhawm hlawm hle a, kan lawm em em a ni,” a ti a, “Tunah chuan school an lut ve dawn ta a, an tan a pawimawhin, anni pawh an phur viau a ni. Nu leh pate tan chhungkuain bungthar pawimawh tak kan kai dawn a ni a, naupang ten an panlai nun hlim taka an hman theih dan kan zawnpui zel a tul a ni,” a ti bawk.
Halima chuan an fa pakua te chu an inngeihin, an chenhonaah harsatna an nei lo niin a sawi a, an inhmangaihin an induhsak tawn em em a, an u, Arby pawh an ngaina hle niin a sawi a, “An unau hian inzawmna nget tak an nei. Unau dang ang bawkin han rik leh laih laih chang te chu a awm ngei a, mahse, harsatna liantham a awm lo. Naupangte hian ze danglam bik an nei theuh a, a then an harh vâng a, a then an ngawichawi a, thenkhat zezawi deuh an nih laiin, thenkhat chu ri deuh bawrh bawrh chi an ni,” a ti.
A tirah chuan doctor ten Halima hian nau pasarih a pai niin an hria a, mahse, Morocco lamah specialist clinic-a an hruai hnuah nau pakua a pai tih an hrechhuak ta a, thla kim lova zai chhuah an ni a, gram 500 leh kg 1 inkara rit an ni hlawm.