Ram rawngbawl hna thawk turin pol. party a pawimawh

Ram rawngbawl hna thawk
turin pol. party a pawimawh
Ram rawngbawl hna thawk turin political party a pawimawh a, mipuiin an rin ngam party a awm loh chuan ram siamthat hna thawh a har tih ZPM president Lalliansawta chuan a sawi.
Zirtawpnia ZPM Upa Committee-in Krismas urlawk an neih hmanpuitu Lalliansawta chuan ram rawngbawl hna thawk turin party a pawimawh a, an inpui ber tih a sawi. “Mi tupawhin ram veiin, a siamthat hna tak tak thawh duh mah se, eng party mi leh sa emaw sawrkarna chelh thei tura mipuiin an rin ngam party a awm loh chuan ram siamthat hna tak tak thawh a har. ZPM pawh pawl anga intelkhawm kan ni a, Pathian leh mipui zarah sawrkarna kan chelh thei ta a. Party hi sawrkarna kan siam theihna a nih avangin kan ngaipawimawh tur a ni,” a ti.
Ram siamtha turin mimal tin an pawimawh a, a bikin paty mi leh sa thinlungah ram siamthat duhna tak tak a awm phawt chuan, chutiang mimal tin intelkhawmna party chuan ram siamthat hna an thawk ngei ang tih a rinawm tih ZPM hruaitu hian sawiin, mimal hlawkna aia ram veina thinlung kan put phawt chuan chu thinlung chu Pathianin mal a sawm ngei ang tih a rin thu a sawi.
ZPM party chhungah pawh hlawm hrang hrang an intelkhawm a. Upa Committee, Thalai Hqrs, Zonu Hqrs, VUC adt. an tih tur theuh an tih avanga vawiin thlenga ZPM party hi la kal zel thei a ni tih an president hian a sawi a ni. “Hruaitu hmasate kutah kan ram damna a awm lo tih mipuiin an hriat avangin ZPM party kutah ram rawngbawl hna an hlan a. Dawngdah takin he ram rawngbawl hna kan thawh a rem ve loa, kan theihna zawng zawng nen Pathian duhdana hna thawh chu kan tih tur a ni,” a ti.