Ram tan Kejriwal tawngtai tum

Delhi Chief Minister Arvind Kejriwal chuan Holi lawmna neih turah ram tana a tawngtai tur thu sawiin, Prime Minister Narendra Modi chu a minister pahnih Manish Sisodia leh Satyendar Jain te mana Lung In-a a khung avangin na takin a sawisel.
Video message a tihchhuahah Delhi Chief Minister chuan India rama inrelbawlna chuan a ngaih a tihthat tawh loh thu sawiin, “Mi tute pawhin sorkar school leh damdawi In te a chhe hle tih an hria a ni. Mi pahnih – Manish Sisodia leh Satyendar Jain te chuan sorkar school leh damdawi In an siam tha a, mahse Lung Inah khung an ni,” tiin a sawi.
“He ramah hian prime minister ber chuan zirna tha leh health facility tha petute lung inah khungin ram rawktute chu a thlawp zawk a, a ngaihmawhawm a ni. Ram tan ka tawngtai ang a. Nang pawh Prime Minister Narendra Modi an thil dik lo a ti nia i hriata hlauhthawnna i nei a nih chuan Holi lai hian ram tan tawngtai ve turin ka ngen che a ni,” tiin Aaam Aadmi Party (AAP) chief chuan a ngen a ni.
Kejriwal chuan Manish Sisodia leh Satyendar Jain te lakah hlauhthawnna a neih loh thu sawiin a chhan chu ‘huaisen’ tak an ni a ti a.
“An huaisen a, ram tan an nunna an hlan ngam. An tumruhna tute mahin an tinghing hauh lovang a. Ka ngaihtuah zawk chu kan ram dinhmun hi a ni zawk a. Mi pangngai te tana thawk leh mi pangngai te ngaithla duh an awm lo,” tiin a sawi bawk.
“Kum 75 hnuah mi pakhat mirethei ber te hnena mihausa te chauhin zirna an pek theih pe a awm a, chu pa chu Manish Sisodia a ni. Ram pumah sorkar damdawi In te a chhe hle a. Kum 75 hnuah mi pakhatin health facility te thlak danglamin health model thar mohalla clincis a siam a, chu pa chu Satyendar Jain a ni. Tunah erawh dawta puhin lung inah khungin an awm mek,” tiin Kejriwal chuan a sawi bawk.
Satyendar Jain hi nikum May thla khan corruption case a man a ni a, Manish Sisodia hi CBI te chuan February 26 khan an man bawk a. An pahnih hian kar katla khan Delhi cabinet atangin banna an thehlut ve ve a ni.
AAP number 2 Sisodia hi thla 9 kaltaa Delhi Lt Governor VK Saxena an a hnawl tak leh CBI a chhui chian tir liquor policy thar kaihhnawihah eirukna thubuai siamsak a ni a. Arvind Kejriwal sorkar chu November 2021 a new polocy an kalpuia liquor license dan kalha pechhuakah puh an ni.
AAP leh Chief Minisetr Arvind Kejriwal te chuan heng puhna te hi hnawl thungin political agenda thila kalpuia inmanna hial thlengah an sawi ve thung.