Ram tana duty laiin Gavi a hliam

Pathianni zan Euro 2024 qualifying Group A match pakhata Spain chakna inkhelah Barcelona midfielder Gavi a vanduai a, ball thunun tur a zuanna lamah a khup tinain, mittui nen Valladolid khelmual a chhuahsan a, a hliam dinhmun endikna result hriat hman la ni lo mah se ‘serious’ tura ngaih a ni a, anterior cruciate ligament injury (khup ruh kara tha chat?) an tih ang kha ni tura ngaih a ni.
Manager Luis de la Fuente chuan Spain a player laka an hlauhthawnna hi sawichhuakin, khati ang vanduaina kha football peng pakhat a nih thu leh a hringnuna hnehna kha ber a nih thu a sawichhuak hial a; Gavi bakah a khelhna pahnih Barcelona leh national team bakah amah, mimal tan pawh hun harsa tak a nih thu a sawi a, an game khelha chak lo ang mai an nih thu a tarlang tel.
Nakkum Germany ram tournament lian khel tura tling tawh Spain hian an mikhual Georgia lakah 3-1 hnehna changin, an goal hmahruai hi minute lina leka defender Robin le Normand tihluh a ni a, minute ruk a liam leh tihah Khvicha Kvaratskhelia chuan mikhual siphurh sutin, half time-ah goal dang a luhbelh lo.
2nd half tir lamah Ferran Torres chuan Spain hma-hruai nawnna goal thawhin, Georgia player Luka Lochoshvili ‘own goal’ hmuh tur a awm zui bawk.
Kum 19 mi Gavi khan ram tan match 29 khel tling chiahin, Catalan team tan game 111 a khel tling tawh bawk.
Pathianni zana Group A inkhel dangah sithum ve ve thunin Scotland leh an mikhual Norway an inhnehtawk ve bawk.
Hampden lama inkhelah hian hun tawp dawna Mohamed Elyounoussi goal khat tihluh hmangin Norway chuan an mikhualna hmunah point khat an thawk-chhuak hram a; Steve Clarke-a team hi an kawtkaiah chak zo lo mah se Germany panna ticket hum tawh an nih avangin thla thara Euro 2024 draw an nghak thei tawh a ni.