Ram tana thisen pe ve lo ten kan inhumhimna chabi an pe hi a pawi: – Zoramthanga

Ram tana thisen pe ve lo leh thihchilh ve loten kawngka chhung atanga kan inhumhimna chabi an pe ta mai chu a pawi takzet tih MNF hruaitu Zoramthanga chuan a sawi.
September 20 khan Mizo National Front party chuan zalenna suala nunna hlantu martarte hriatrengna – Martarte Ni an hmang a. Mizoram hmun hrang hrangah an party hruaituten an hmanpui a. Aizawla hmannaah MNF president Zoramthanga chuan, Mizo hnam matarte chu hmun hrang hrang – Burma, Bangladesh leh Zoramah an awm a. An chhungte, an tu leh fate thlah kalzel thahnem tak avangin MNF zungkaihna chu a nghet lo thei lo tih sawiin, an inpekna avangin special protection (Article 371 G) kan nei a. Inhumhimna bik kan neihna chu martarte thisen leh Zoram mipui zawng zawng tawrh man a ni tih a sawi.
Heng inhumhimna tha bik kan neih hi hnawk ti pawl an awm nia sawiin, dan thar – Forest (Conservation) Amendment Act 2023 siam a ni ta tih a sawi. “MNF chuan he dan hi hman kan duh lo thei a, kan duh loa, House-ah kan pass duh lo. ZPM sawrkarin martarte thisena lei leh Zoram mipuiin kan tawrh chhuah, kan kulh chahbi chu kawngka chhung atanga an pe ringawt mai hi a pawi takmeuh a. Ram tana thisen pe ve lo, thihchilh ve lo leh hnam thuthlunga ding ve loten dawih aw pu in an tlawm rang lutuk a. Kum khat tha an sawrkar chauh tihin kan sakhua, culture leh ram neitu nihna, kan inhumhimna chahbi an pe mai hi a pawi takzet,” a ti.
Special session koin MNF sawrkarin a hnawl ang khan hnawlin, sut leh ngei turin ZPM sawrkar an phut tih a sawi a ni.
West Phaileng-a hmanpuitu MNF senior vice president Dr R Lalthangliana chuan tun dinhmuna Zoram leh Zofaten a tha zawnga kan hun tawn leh zalen taka kan awm theih chhan chu kan hnam sipai martarte leh martar huama zalenna sualtute thawhrah a ni, tiin, India danpuia Article 371(G) dan ropui kan neih theihna chu hnam sipaite thawhrah a ni tih a sawi.
MNF vice president, leader of opposition Lalchhandama Ralte chuan, MNF-in ni pawimawh tak tak an neih zingah Martarte Ni chu a pawimawh bik hle tih sawiin, “Kan hnam pasaltha, zalenna suala nunna hlu tak hlantute hi kan thinlunga a lailum changtute an ni a. Hnamdang pawhin an ngaisang hle. Hnam pasaltha thahnem takin ram leh hnam tana nunna hlanin, an thisen kha kan hnam culture-a phun ngheh a ni. An inhlanna kha Mizote inpumkhatna symbol a ni. Pilotics-ah harhtharna min thlen a. An thisen avang chauhin MNF hi ‘hnam party’ tia chal theih awmchhun kan ni. Martarte thisena lei Mizoram hi state dangte anga lo piang a ni ve lo a. Article 371(G) hnuaia kan inhumhimna bik hi a suala sualchuah a ni,” a ti.
MNF National Core Committee member Tawnluia pawhin, martarte avanga remna thuthlung kan neih chu sawrkar mekin palzutin, FCAA an pawm a. Ram leilung neitu kan nihna chu hralhin a awm ta tih a sawi. “ZPM sawrkarin he dan a pawmna hi sut leh ngei turin ka ngen a. An hnukkir duh lo a nih pawhin MNF chuan kan sawrkar leh veleh kan hnukkir ang. Martarte avang pawhin he thilah hian kan hnungtawlh dawn lo,” a ti.