Tunhnaia Champhai district hmun palia ram kangah dan bawhchhiatna awm nia langah hma la tura ngenin Champhai Police hnenah first information report (FIR) pali thehluh a ni tawh.
Champhai District Level Fire Prevention Committee aiawhin member secretary, DFO Lalduhthlana hminga FIR thehluhah hian a chhan hrang hrang tarlan zingah – huan/ lo hal hmaa VC-te hriattir hmasak loh avanga Rule-4 (4) of the Mizoram (Prevention & Control of Fire in the Village Ram) Rules 2001 bawhchhiatna awm; huan/lo hal atanga hmundanga kangmei a chhuah loh nana meilam phiah a ni lo emaw phiah ni si, kangmei chhuak veng tura meilam sial a zau tawk lo tih finfiah a nih vang; kangmei chhuakin ram zau tak tichhiain thing engemawzah a kanral avanga Mizoram Forest Act Sec.31 (1) bawhchhiat a nih vang; khawtlang tiraltia a bul vela in tana hlauhthawnawm a thlen vang leh fimkhur lo taka lo/ huan hal leh thuneitute tawiawm tha lo te chu a langsar zual a ni.
Heng ram kang zinga la kang mek Champhai Tlangsama Forest department ram chu Champhai district leh Mizoramin a mamawh, ram dang atanga dan loa ramsa lakluh mante dahna tur, ‘Satellite Wildlife Rescue Centre of Aizawl Zoo at Champhai’ siamna tura hmunhma rawt niin, hemi atan hian sawrkar laipuiah pawh beiseiawm taka project proposal thehluh tawh a ni tih DFO hian a sawi.
Tlangsam bakah hian Hmunhmeltha leh Zote ramah pawh Thawhtanni khan kangmei a chhuak a. Hmunhmeltha leh Zote ram erawh Fire Station Champhai leh tlawmngaia thawkchhuak ten an thelhmit thei a; Tlangsam ram chhunga kangmei chhuak hi Forest department leh YMA Tlangsam Branch-in an la thelh a ni.
-- Advertisement --
FIR-a tarlan ram tih kanna hmun leh a hun:
# March 6-a Ngur khaw hmun hluia huan hal avanga a bulhnaia mimal huan tin 12.5 vela zau kang
# March 8 tlai dar 5 vela leipui hal avanga Champhai Kanan Veng thlanmual ram kang
# March 11 chawhma dar 10 vela Chhungte VC ram chhunga Hnahthial Sih chunga lo hal avanga kangmei chhuak leh hemi avanga ram tin 50 vela zau kang
# March 13 chawhma dar 11.10 vela Tlangsam tuikhuah kawra huan hal avanga Tlangsam VC ram leh a ep chiaha awm Forest department plantation-a kangmei chhuak. Tlangsam rama kangmei chhuak avang hian VC ram tin 10 hmun vel leh Forest department plantation tin 7.5 hmun a kang tawh.
# FIR hi kangmei tichhuaktu a puh mi 6 – Ngur khua 1, Kanan Veng 4 leh Tlangsam 1 te laka thehluh a ni.